აჭარის ტურიზმის დეპარტამენტის სტატისტიკური მონაცემებით, რეგიონის ტერიტორიაზე ტურისტთა განთავსების ობიექტების მიხედვით აჭარას 2014 წლის იანვარ-დეკემბერში 10.47%-ით მეტი ტურისტი სტუმრობდა, ვიდრე 2013 წლის ანალოგიურ პერიოდში.
დეპარტამენტის ინფორმაციით, სასტუმრო სექტორში ტურისტთა რაოდენობრივი მაჩვენებლებით პირველ ათეულში მოხვდა: თურქეთი, აზერბაიჯანი, რუსეთი, უკრაინა, სომხეთი, პოლონეთი, ისრაელი, ბელორუსია, ყაზახეთი, ლიტვა.
2014 წელს უცხოელ ტურისტთა შორის ზრდის პროცენტული მაჩვენელით გამოირჩევა ყაზახეთი (106,5%), ბელორუსია (53,2%), სომხეთი (36,7%), აზერბაიჯანი (29,7%), პოლონეთი (29,1%), რუსეთი (21,9%), უკრაინა (12,9%) და ისრაელი (8,2%). "ამ ჯგუფში შედის სწორედ ის ქვეყნები, რომლების სამიზნე ტურისტულ ბაზრებს მიეკუთვნება და სადაც აჭარის ტურიზმისა და კურორტების დეპარტამენტი აწარმოებს აქტიურ მარკეტინგულ და სარეკლამო ღონისძიებებს.
აღსანიშნავია, რომ აჭარაში შემოსულ დამსვენებელთა დიდი ნაწილი კერძო სექტორშია განთავსებული, რომელთა აღრიცხვა დიდ სირთულეებთანაა დაკავშირებული. ამ პრობლემის გადასაჭრელად, აჭარის ტურიზმის დეპარტამენტში მიმდინარეობს მუშაობა სტატისტიკის ახალ მეთოდოლოგიაზე, რომელიც სხვადასხვა კველევებს დაეფუძნება და რეგიონში ტურისტთა რაოდენობის რეალურ სურათს შექმნის",- აცხადებენ აჭარის ტურიზმის დეპარტამენტში.
დადებითი ტენდენცია ნარჩუნდება ბათუმის საერთაშორისო აეროპორტში შემოსული უცხოელი ტურისტების მიმართულებითაც. 2014 წლის მანძილზე ბათუმის საერთაშორისო აეროპორტში შემოსული უცხოელი ტურისტების რაოდენობა 19%-ით აღემატება 2013 წლის, ხოლო 44%-ით 2012 წლის მონაცემებს.
"უპრეცედენტოა საკრუიზო ტურიზმის სტატისტიკური მონაცემები: 2014 წელს 33 საკრუიზო გემით 14 793 ტურისტი შემოვიდა ბათუმში, რაც 186,5%-ით აღემატება 2013 წელს საკრუიზო გემებით შემოსული ტურისტების რაოდენობას (16 გემი, 5162 ტურისტი 2013 წელს)",- განმარტავენ დეპარტამენტში.
აღსანიშნავია, რომ 69,8%-ითაა გაზრდილი აჭარის ტურიზმის საინფორმაციო ცენტრების მომსახურებით მოსარგებლე ტურისტების რაოდენობა.
