"კომპანიისთვის არანაირი მნიშვნელობა არ აქვს იურიდიული პირი ყიდულობს თუ კერძო პირი. გაზის ტარიფი ერთნაირი უნდა იყოს. ზოგადად მიდგომა დისკრიმინაციულია და მიმაჩნია, რომ ეს ყველაფერი არ არის იმ გამოწვევების შესაბამისი რა გამოწვევების წინაშეც საქართველოა. ბიზნესზე ორიენტირებულობა და ბიზნეს გარემოს გაუმჯობესების ხელშეწყობა სულაც არ გულისხმობს იმას, რომ ადამიანები ვინც მეტს მოიხმარს და ვისაც მეტის გადახდის თეორიული შესაძლებლობა აქვს ამის გამო ეს ადამიანები უნდა "დაისაჯონ". ის პოლიტიკა რაც პოლიტიკაც ამ ტარიფის ჩამოყალიბებაშია დასჯის გარდა სხვა არაფერია. ანუ პირი, რომელსაც აქვს შემოსავალი და გადახდის შესაძლებლობა ისჯება სწორედ გაზრდილი ტარიფის გამო "ისჯება". ეს არის ძველი სოციალისტური მენტალური გადმონაშთი, როცა ადამიანის და იურიდიული პირის გამიჯვნა ხდებოდა. იურიდიული პირის  ქონებას, შემოსავალს არ უფრთხილდებოდა სახელმწიფო. არ უფრთხილდებოდა იმიტომ, რომ თავად არ მონაწილეობდა ამ დოვლათის შექმნაში", - განმარტავს კალანდაძე.
ექსპერტის აზრით, თუ კი პურის მწარმოებლებს განსხვავებული ტარიფი დაუწესდათ, რატომ არ დაუწესდათ იგივე შეღავათები ისეთ სტრატეგიულ ობიექტებს როგორიცაა საავადმყოფოები, სკოლები და სხვა.

"მესმის, რომ პური არის სტრატეგიული მიმართულება, მაგრამ რატომ არ არის სტრატეგიული მაგალითად სკოლა? რატომ არ არის სტრატეგიული საავადმყოფო, ხორცის გადამამუშავებელი საწარმო და სხვა. აქაც დისკრიმინაციული მიდგომაა. ყველაზე ცუდი არის ის, რომ სახელმწიფო წყვეტს რომელიღაც მაღალჩინოსანი, ვიღაც მაღალჩინოსანი, რომელსაც ფეხიფეხზე აქვს გადადებული თვითონ არ მონაწილეობს დოვლათის შექმნაში და თავად წყვეტს რას რა ფასი უნდა ქონდეს. ეს არის პირდაპირი ჩარევა ბინზესში და ბიზნესის განვითარებისთვის ხელისშემშლელი შემაფერხებელი ფაქტორების ხელოვნურად გაჩენა", - განმარტავს კალანდაძე.

შეგახსენებთ, რომ 1-ელი მარტიდან კომერციული მომხმარებლებისათვის გაზის ტარიფი ძვირდება. როგორც „სოკარ ჯორჯია გაზში" განმარტავენ, ბუნებრივი გაზის იმპორტიდან გამომდინარე, აშშ დოლართან მიმართებაში ეროვნული ვალუტის კურსის ცვლილების გამო, აუცილებელი გახდა ბუნებრივი გაზის საფასურის კორექტირება კომერციული სექტორის მომხმარებლებისათვის.
შესაბამისად, 1 მარტიდან შპს „სოკარ ჯორჯია გაზის" ყველა კატეგორიის კომერციულ მომხმარებლებზე, გარდა პურის ქარხნებისა, მისაწოდებელი ბუნებრივი გაზის ფასი განისაზღვრება 90 თეთრის ოდენობით, დღგ-ის ჩათვლით.
„ყაზტრანსგაზ -თბილისმა" უკვე დაიწყო აბონენტების გაფრთხილება და მათგან მოითხოვს ხელშეკრულებების ახალ ფასზე გაფორმებას. წინააღმდეგ შემთხვევაში „ყაზტრანსგაზ -თბილისის" წარმომადგენლები აბონენტებს ბუნებრივი არის შეწყვეტით ემუქრებიან.
„ყაზტრანსგაზ-თბილისის" სპეციალური მმართველის გია ბენაშვილის წერილში, რომელიც აბონენტებს ხელშეკრულებასთან ერთად ეგზავნებთ, აღნიშნულია, რომ აბონენტებმა ხელშეკრულებას ხელი 7 თებერვლამდე მოაწერონ.
„გაცნობებთ, რომ არასაყოფაცხოვრებო მომხმარებლისთვის მისაწოდებელი ბუნებრივი გაზის ტარიფი 2015 წლის 1 მარტიდან განსაზღვრულია ყოველი 1000 მ3 გაზისთვის 900 ლარით. დამატებული ღირებულების გადასახადის ჩათვლით", - აღნიშნულია წერილში.