პროექტის „სოფლიდან გაუსვლელად" ფარგლებში, სახელმწიფო ქონების ეროვნული სააგენტო თანამშრომლობას იწყებს „საქართველოს ფერმერთა ასოციაციასთან". თანამშრომლობის მიზანია სასოფლო-სამეურნეო დანიშნულების მიწებზე იჯარით გაცემის მიზნით გამოცხადებული ელექტრონული აუქციონების შესახებ ინფორმაციის ეფექტური გავრცელება დაინტერესებულ ფერმერებს შორის. სააგენტოს მარკეტინგისა და საზოგადოებასთან ურთიერთობის სამსახურის თანამშრომლებისა და საქართველოს ფერმერთა ასოციაციის თავმჯდომარის შეხვედრის შედეგად გადაწყდა, რომ ინფორმაცია ყოველი ახალი გამოცხადებული აუქციონის შესახებ გავრცელდება ფერმერთა ასოციაციის ვებ-გვერდსა და ფეისბუქ გვერდზე, რომელსაც თვეში საშუალოდ 6000-მდე მნახველი ყავს. როგორც სააგენტოში აცხადებენ, ეს გადაწყვეტილება ხელს შეუწყობს უფრო მეტი დაინტერესებული პირის ჩართვას აღნიშნულ პროექტში და ინფორმაციის ხელმისაწვდომობის გაზრდას ლოკალურ დონეზე.
სახელმწიფო ქონების ეროვნულმა სააგენტომ პროექტი „სოფლიდან გაუსვლელად" 2014 წლის 1 ივნისს დაიწყო. პროექტის მიზანია ადგილობრივი მოსახლეობის ინფორმირება რეგიონში გამოცხადებული აუქციონების შესახებ. პროექტის სამიზნე აუდიტორიას წარმოადგენს სხვადასხვა მუნიციპალიტეტების ტერიტორიაზე მცხოვრები მოსახლეობა, მათ შორის, ადგილობრივი ფერმერები და მეწარმეები.
ინფორმაციისთვის, „საქართველოს ფერმერთა ასოციაცია" 2012 წელს შეიქმნა და იგი ფერმერთა ჯგუფებს, ინდივიდუალურ ფერმერებს და სოფლის მეურნეობის კუთხით მომუშავე ორგანიზაციებსა და ასოციაციებს აერთიანებს. საქართველოს ფერმერთა ასოციაცია აქტიურად თანამშრომლობს სამთავრობო, დონორ და საგანმანათლებლო ორგანიზაციებთან. დღეისათვის საქართველოს ფერმერთა ასოციაციაში გაერთიანებულია 1000-ზე მეტი ფერმერი და 60-მდე ასოცირებული, წევრი კომპანია.
