ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი ამ დროისათვის ეკონომიკური ზრდის გადახედვის აუცილებლობას ვერ ხედავს. მინისტრის თქმით, მთავრობა ყველა პარამეტრს ონლაინ რეჟიმში აკვირდება და თუ ამის საჭიროება იქნება, გადაწყვეტილებაც შეთანხმებულად იქნება მიღებული.
როგორც ცნობილია, დღეს სებ-ის პრეზიდენტმა განაცხადა, რომ უცილებელია მთავრობამ ეკონომიკური ზრდის 5%-იანი პროგნოზის გადახედვა შემცირების მიმართულები განახორციელოს.
,,მონეტარული პოლიტიკა და ინფლაციის კონტროლი არის ეროვნული ბანკის ექსკლუზიური სფერო. რაც შეეხება საბიუჯეტო მხარეს, იანვარში გეგმა შესრულებულია მცირეოდენი გადაჭარბებითაც კი.
მთავრობა და ეროვნული ბანკი ერთობლივად ყველაფერს აკეთებენ იმისთვის, რომ საგარეო მოვლენების ზეგავლენა საქართველოს ეკონომიკაზე და ვალუტის კურსზე იყოს რაც შეიძლება მინიმალური. რაც შეეხება ეკონომიკური ზრდის პროგნოზს, ჩვენ ძალიან მჭიდროდ ვთანამშრომლობთ და, ფაქტობრივად, ონლაინ რეჟიმში ვუყურებთ ყველა პარამეტრს. როგორც კი ამის საჭიროება იქნება, რა თქმა უნდა, შეთანხმებულად მივიღებთ ამ გადაწყვეტილებას. დღესდღეობით რაიმე ზუსტი პროგნოზის გაკეთება ნაადრევია. ერთი უნდა ითქვას, რომ ყველა მაკროეკონომიკური პარამეტრი მთავრობისა და ეროვნული ბანკის მხრიდან არის მკაცრი და კოორდინირებული კონტროლის ქვეშ‘'- განაცხადა კიევში ვიზიტად მყოფმა ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა.
შეგახსენებთ, რომ ბოლოდროინდელ ეკონომიკურ პროცესებთან დაკავშირებით, დღეს ეროვნული ბანკის პრეზიდენტმა გიორგი ქადაგიძემ საგანგებო ბრიფინგი გამართა, რომელზეც მან ისაუბრა იმ ღონისძიებების შესახებ, რომლის გატარებასაც საქართველოს ეროვნული ბანკი მომავალი კვირიდან გეგმავს.
„ლარის გაცვლითი კურსის გაუფასურებამ მიაღწია იმ ზღვარს, როდესაც არსებობს მნიშვნელოვანი საფრთხე, რომ ინფლაციური მოლოდინები შესაძლოა ფასების ზრდაში გადაიზარდოს. მოგეხსენებათ, რომ დღესდღეობით ამ პროცესით ძალიან ზარალდებიან ჩვენი ქვეყნის ის მოქალაქეები, რომლებსაც ვალდებულებები დოლარში აქვთ, ხოლო შემოსავლები ლარში. ამიტომ ლარის კურსის კიდევ უფრო გაუფასურება, კიდევ უფრო გააუარესებს მათ ეკონომიკურ მდგომარეობას, რაც საბოლოო ჯამში ასევე უარყოფითად აისახება ქვეყნის ეკონომიკაზე.
ზემოთ თქმულიდან გამომდინარე, მივიღეთ გადაწყვეტილება მომდევნო კვირიდან დავიწყოთ მონეტარული პოლიტიკის გამკაცრება. ჩვენ გამოვიყენებთ ჩვენს ხელთ არსებული გადაცემის მექანიზმების ყველა ინსტრუმენტს. ჩვენი ჩარევა იქნება თანმიმდევრული, ეტაპობრივი იმ მოცულობის და დოზის, რაც საჭირო იქნება მაკროეკონომიკური სტაბილურობის უზრუნველსაყოფად.
ამავე დროს, როგორც იცით ჩვენ გვქონდა ინტენსიური მოლაპარაკებები და განხილვები მთავრობასთან და ასევე მიღებულია გადაწყვეტილება, რომ ფისკალური ნაწილი, ანუ ბიუჯეტის ხარჯვითი ნაწილი მომდევნო თვეებში იქნება ან დაბალანსებული ან უკეთეს შემთხვევაში პროფიციტული. ამავე დროს მნიშვნელოვანია აღინიშნოს, რომ იმ გამოწვევების ფონზე რაც დღეს არის ეკონომიკაში და იმ რიცხვებისა და მონაცემების ანალიზის საფუძველზე, რომელიც დღეს ჩვენ უკვე გვაქვს, აუცილებელია დავიწყოთ ეკონომიკური ზრდის 5%-იანი პროგნოზის გადახედვა შემცირების მიმართულებით და შესაბამისი ფისკალური და მაკროეკონომიკური ინდიკატორების გადაგეგმვა ანუ ახალი გეგმის გაკეთება იმისთვის, რომ ეკონომიკური პოლიტიკა ადეკვატურად ასახავდეს და პასუხობდეს იმ გამოწვევებს, რომელიც დღეს არის ჩვენს ქვეყანაში", - განაცხადა ეროვნული ბანკის პრეზიდენტმა.
