ბიზნესი მიიჩნევს, რომ ლარის სტაბილიზაციისათვის ინვესტიციების ზრდა და ტურიზმის განვითარება მნიშვნელოვანი ფაქტორია. "თიბისი ბანკის" გენერალური დირექტორი ვახტანგ ბუცხრიკიძე განმარტავს, რომ 2015 წლის განმავლობაში ბიზნესმა და მთავრობამ ერთობლივად, ორი ძირითადი მიმართულებით უნდა იმუშაოს.
"ეს არის უცხოური ინვესტიციები, სადაც რეფორმები რაც მეტი იქნება წელს და ოპერატიულად მოხდება, უფრო ხელს შეუწყობს ინვესტიციების მოზიდვას. კარგია ის, რომ "ბი პი" აპირებს ნახევარი მილიარდი დოლარის ინვესტიციის განხორციელებას, რაც დაეხმარებდა ეკონომიკას.
მეორე ფაქტორი კი არის ტურიზმი. ანუ ტურიზმთან დაკავშირებით, რაზეც ახლა მიდის საუბარი. ალბათ მოკლე პერიოდში მოხდება ვიზის გამარტივებული პროცედურები. ეს რაც უფრო სწრაფად მოხდება, ის ირიბად, უფრო ხელს შეუწყობს ტურიზმის განვითარებას. ეს ის ფაქტორებია, რაც საერთო ჯამში გამოწვევაა ეკონომიკისთვის"- აცხადებს ვახტანგ ბუცხრიკიძე.
"თიბისი ბანკის" ხელმძღვანელი დადებით ასპექტებზეც ამახვილებს ყურადღებას და განმარტავს, რომ დადებითი არის ის, რომ ნავთობის ფასი არის საკმაოდ შემცირებული და თუ იგივე ფარგლებში დარჩება,რაც დღეს არის, მაშინ ეს ნიშნავს, რომ ვალუტაზე მოთხოვნა 300 მლნ დოლარით შემცირდება.
"კარგია ის, რომ საიმპორტო კვებით პროდუქტებზე ფასები შემცირებულია. ბოლო დღეების განმავლობაში, კურსი თუ დოლარს შევადარებთ, "გაფუჭდა", მაგრამ კარგია ის, რომ ინფლაციური მოვლენები არ შეინიშნება, რაც კარგის მაჩვენებელია.
მეორეს მხრივ ლარის გაუფასურება ხელს უწყობს ქვეყნის კონკურენტუნარიანობის გაზრდას. ანუ თუ ინფლაცია არ გაიზრდება, ეს ნიშნავს იმას, რომ უცხოელი ტურისტისათვის საქართველო უფრო გაიაფდება, რაც კარგის მანიშნებელია"- აცხადებს ბუცხრიკიძე.
"თიბისი ბანკის" ხელმძღვანელის ინფორმაციით, გამოწვევა არის ის, რომ სამწუხაროდ 60 %-მდე სესხებისა არის დოლარში.
"განსხვავებით 2008-2009 წლებისაგან, საკრედიტო ბარათები და სამომხმარებლო სესხები არის ლარებში. თუ ავიღებთ ფიზიკური პირების პორტფელს აქაც 50 %-ზე მეტი არის ლარებში. ეს გარკვეულწილად კომფორტის ელემენტია.
ალბათ ნაწილობრივ სირთულეები იქნება იპოთეკების ნაწილში. ამ სექტორს თუ ავიღებთ სესხების 80 %-ი არის უცხოურ ვალუტაში"- განმარტავს ვახტანგ ბუცხრიკიძე.
რაც შეეხება კორპორატიულ და მცირე და საშუალო ბიზნეს, ვახტანგ ბუცხრიკიძის თქმით, აქც სესხების 65 %-ი არის უცხოურ ვალუტაში.
"მაგრამ იქაც არის კომპანიები, რომლებიც საექსპორტოდ არიან ორიენტირებულნი და რაზეც ლარის კურსის ცვალებადობა არ ახდენს ცუდ ზეგავლენას"- აცხადებს ბუცხრიკიძე.
