29 იანვარს, სასტუმრო „თბილისი მერიოტში" გაიმართა შეხვედრა საქართველოს ფინანსთა მინისტრ, ნოდარ ხადურსა და თურქეთის რესპუბლიკის საბაჟოსა და ვაჭრობის საქმეთა მინისტრის ნურეტინ ჩანილიკს შორის.
შეხვედრაზე განიხილეს ორმხრივი და მრავალმხრივი თანამშრომლობის საკითხები, მათ შორის, ყურადღება გამახვილდა ორი ქვეყნისთვის სტრატეგიულად ისეთ მნიშვნელოვან თემებზე, როგორიც არის: საქართველოსა და თურქეთს შორის სავაჭრო-ეკონომიკური პარტნიორობის გააქტიურება, საბაჟო-გამშვები პუნქტების ეფექტური მართვა, ტურისტული და სატრანსპორტო ნაკადის გაზრდის ხელშეწყობა და სხვა.
ფინანსთა მინისტრმა სტუმარს მადლობა გადაუხადა იმისთვის, რომ მან პირველი ოფიციალური ვიზიტი სწორედ საქართველოში დაგეგმა და იმედი გამოთქვა, რომ თანამშრომლობა მომავალშიც აქტიურად გაგრძელდება.
შეხვედრაზე თურქეთის საბაჟოსა და ვაჭრობის საქმეთა მინისტრმა თურქეთის მთავრობის სახელით კიდევ ერთხელ მხარი დაუჭირა საქართველოს ტერიტორიულ მთლიანობას და აღნიშნა, რომ ყველა საერთაშორისო დონეზე თურქეთი მომავალშიც გააგრძელებს ჩვენი ქვეყნის პოზიციების დაცვას ამ მიმართულებით.
„შედგა მნიშვნელოვანი შეხვედრა ჩვენი სტრატეგიული, პარტნიორი ქვეყნის - თურქეთის რესპუბლიკის საბაჟოსა და ვაჭრობის საქმეთა მინისტრთან. თურქულმა მხარემ გაგვაცნო გეგმა, რომელიც უკავშირდება აჭარის რეგიონში, თურქეთის მხრიდან საბაჟო-გამშვები პუნქტის რეორგანიზაციას, რომლის დასრულების შემდეგაც, ორ ქვეყანას შორის სავაჭრო ურთიერთობები კიდევ უფრო ინტენსიურ ხასიათს მიიღებს. ჩვენ ყველაფერს გავაკეთებთ, რათა იმპორტიორ და ექსპორტიორ კომპანიებს, მოქალაქეებს ხელი შევუწყოთ ამ მიმართულებით მათ საქმიანობაში", - აღნიშნა ფინანსთა მინისტრმა, ნოდარ ხადურმა.
„საქართველო და თურქეთი პარტნიორი სახელმწიფოებია. ჩვენს ქვეყნებს შორის სავაჭრო პოტენციალი მაღალია, თუმცა საჭიროა მათი კიდევ უფრო გააქტიურება. ვფიქრობ, ბაქო-თბილისი - ყარსის სარკინიგზო მაგისტრალი, რომელიც წლის ბოლოს დასრულდება, ასევე თურქეთის მხრიდან „ჩილდირ/აქთაშის", ხოლო საქართველოს მხრიდან საბაჟო-გამშვები პუნქტი „კარწახის" ამოქმედება, ხელს შეუწყობს სავაჭრო სფეროში პროცესების დაჩქარებას. ჩვენ ასევე ვგეგმავთ თურქეთის მხრიდან „სარფის" საბაჟო-გამშვები პუნქტის სრულ მოდერნიზებას და ამით ჩვენი ქვეყნების სავაჭრო-ეკონომიკური პოტენციალის მაქსიმალურად გამოყენებას", - განაცხადა თურქეთის რესპუბლიკის საბაჟოსა და ვაჭრობის საქმეთა მინისტრმა ნურეტინ ჩანილიკმა.
ვიზიტის ფარგლებში დღეს თურქული დელეგაციის წევრები დაათვალიერებენ საბაჟო და საგადასახადო ინფრასტრუქტურას. თურქეთის საბაჟოსა და ვაჭრობის საქმეთა მინისტრს თურქეთის საელჩოში დაგეგმილი აქვს შეხვედრა თურქ ბიზნესმენებთან. თურქეთის რესპუბლიკის საბაჟოსა და ვაჭრობის საქმეთა მინისტრის ოფიციალური ვიზიტი საქართველოში დღეს სრულდება.
