საქართველოს საკანონმდებლო ორგანოს ქუთაისიდან თბილისში ნაწილობრივ გადმოტანის შემდგომ, ძველი დისლოკაციის ადგილზე დაბრუნებას ითხოვს აჭარის უმაღლესი საბჭოც.
ირკვევა, რომ უმაღლესი საბჭოს ბათუმში დაბრუნებისათვის, ახალი შენობის აშენება გახდება საჭირო, რადგანაც ის ადგილი, სადაც უწინ უმაღლესი საბჭო "ცხოვრობდა" ინვესტორის საკუთრებაა. თუმცა იმისათვის, რომ შენობა აშენდეს ჯერ სახელმწიფომ შესაბამისი ტერიტორია უნდა გამონახოს, რაც ბათუმის ცენტრში ალბათ არ გამოვა, რადგანაც ბათუმის ცენტრით ინვესტორების მოძიება უფრო მარტივია და მეორეც, ცენტრში თავისუფალი ფართი ფაქტობრივად აღარც არის. თუმცა ბათუმის ცენტრზე პრეტენზია არც აჭარის უმაღლეს საბჭოში აქვთ, სადაც განმარტავენ, რომ მთავარია უმაღლესი საბჭოს შენობა ბათუმში იყოს და კონკრეტულ მისამართს მნიშვნელობა უკვე აღარ აქვს.
აჭარის უმაღლესი საბჭოს საფინანსო-საბიუჯეტო და ეკონომიკურ საკითხთა კომისიის თავმჯდომარე ალექსანდრე ჩიტიშვილი ამბობს, რომ აჭარის უმაღლესი საბჭოს შენობისთვის ტერიტორიის გამოყოფაზე აჭარის მთავრობას უახლოეს დღეებში მიმართავენ.
"როგორც კი მთავრობა ადგილს გამოყოფს ამის შემდეგ ჩაისმება მისი მშენებლობა ბიუჯეტში.
აღნიშნულ საკითხზე საუბარი იყო ბიუჯეტის განხილვის დროს. დღეს, ან ხვალ აჭარის მთავრობის სახელზე გაიგზავნება ოფიციალური წერილი, რათა ბათუმში ადგილი გამოიყოს. ადგილს მნიშვნელობა არ აქვს, მთავარია ბათუმში იყოს.
ამ პროცესის შემდეგ კი საუბარი წავა ჩვენს ბიუჯეტში ცვლილების შეტანაზე, უმაღლესი საბჭოს ახალი შენობის აშენება კი შემდგომ მოხდება. ახალი მოწვევის უმაღლესი საბჭო, რომ მოვა ალბათ ამ დროისათვის იქნება აშენებული. შენობა ჩვენ არ მოგვესწრება",- აცხადებს ალექსანდრე ჩიტიშვილი.
რაც შეეხება თუ რატომ დადგა დღისწესრიგში უმაღლესი საბჭოს შენობის ბათუმში დაბრუნება, ჩიტიშვილი ხალხთან სიახლოვის პრობლემას და გაზრდილ ხარჯებს ასახელებს.
"როდესაც მიხეილ სააკაშვილმა პარლამენტის შენობა გადაიტანა ქუთაისში, ამათაც გამოიჩინეს ინიციატივა და უმაღლესი საბჭოს შენობა გადაიტანეს ჩაქვში. ვფიქრობ, რომ ეს თავიდანვე მიუღებელი პროცესი იყო. მოსახლეობას ჩაქვში მოსვლის პრობლემაც გააჩნია. შემდგომ ჩვენი ავტომობილის მომსახურების ხარჯები, ყოველდღიური მისვლა-მოსვლისთვის ჩაქვში, - არის გაზრდილი. თანამშრომლები ვერ სარგებლობენ 1 საათიანი შესვენებით", - აცხადებს ალექსანდრე ჩიტიშვილი.
აჭარის უმაღლესი საბჭოს საფინანსო-საბიუჯეტო და ეკონომიკურ საკითხთა კომისიის თავმჯდომარე აცხადებს, რომ უმაღლესი საბჭოს ბათუმში დაბრუნებას ხარჯების შემცირება მოყვება, ხოლო რაც შეეხება ახალი შენობის მშენებლობის ხარჯებს, საბჭოს თანხების მოძიების საკუთარი ფორმულირებაც გააჩნია. უფრო კონკრეტულად კი უმაღლეს საბჭოში ფიქრობენ, რომ ჩაქვში საბჭოს შენობისა და მიმდებარედ არსებული 2,5 ჰა ფართის გასხვისებიდან შემოსული თანხის 50 %-ი ბათუმში ახალი შენობის აშენება იქნება შესაძლებელი.
"რეგიონში რომ პრობლემებია, ამ პრობლემებს არ წყვეტს აჭარის ავტონომიური ბიუჯეტი. ამ პრობლემებს წვეტს ცენტრალური ბიუჯეტი. ჩვენ რომ კომფორტი გვდომოდა ძალიან მაგარი კაბინეტებია ჩაქვში, უმაღლეს საბჭოში. საუბარი იამზეა, რომ ვიყოთ მოსახლეობასთან ახლოს და მოსახლეობას გავუადვილოდ ურთიერთობა უმაღლეს საბჭოსთან",- ასე ამართლებს საბჭოს გადაწყვეტილებას ალექსანდრე ჩიტიშვილი.
უკვე ცნობილია, რომ საპროექტო სამუშაოებისათვის, 2015 წლის ბიუჯეტში გარკვეული თანხების ჩასმას ითხოვს აჭარის უმაღლესი საბჭო. საბჭომ 2015 წლის ბიუჯეტზე საკუთარი შენიშვნები აჭარის ფინანსთა და ეკონომიკის მინისტრს უკვე გადაუგზავნა, სადაც საპროექტო სამუშაოებისათვის თანხის გამოყოფაც მოითხოვა. თუმცა როგორც აჭარის ფინანსთა და ეკონომიკის მინისტრი განმარტავს, საბჭოს პრიორიტეტების განხილვისას, ახალი შენობის დაპროექტებასა საუბარი არ ყოფილა, თუმცა მინისტრმა აღნიშნა, რომ სამინისტრო საკანონმდებლო ორგანოს შენიშვნებზე იმსჯელებს და სწორედ ამის შემდეგ მიიღებს გადაწყვეტილებას.
შეგახსენებთ, რომ აჭარის უმაღლესი საბჭოს ადგილმდებარეოპბა ბათუმიდან ჩაქვში 2012 წელს გადაიტანეს.
