"ხელისუფლება კისრულობს ვალდებულებას გაატაროს სტრუქტურული რეფორმები, ეკონომიკური ზრდის დაჩქარებისა და ინკლუზიურობის უზრუნველსაყოფად", - აღნიშნულის შესახებ განცხადება საქართველოში საერთაშორისო სავალუტო ფონდის მისიის უფროსმა მარკ გრიფიტსმა გააკეთა.
როგორც ცნობილია, 15-28 ოქტომბერს თბილისს საერთაშორისო სავალუტო ფონდის მისია სტუმრობდა. მათი ვიზიტი მიზნად ისახავდა "სარეზერვო დაფინანსების მექანიზმის" პირველი მიმოხილვის ფარგლებში დისკუსიების გამართვას. თავად პროგრამა 2014 წლის 30 ივნისს დამტკიცდა, ის 36 თვე გაგრძელდება და 100 მილიონი სპეციალური სესხების უფლების (დაახლოებით 154 მილიონი აშშ დოლარი) გამოყოფას ითვალისწინებს.
„საქართველოს ხელისუფლებასთან გასულ თვეს გამართული დისკუსიების შედეგად, საქართველოს საკითხებზე მომუშავე ეკონომისტების დონეზე, მივაღწიეთ შეთანხმებას - ქვეყნის მთავრობისა და საქართველოს ეროვნული ბანკის ეკონომიკური პოლიტიკის პროგრამის ძირითად ელემენტებზე. პარლამენტში წარდგენილი ბიუჯეტის პროექტი მოწმობს, რომ მთავრობა მტკიცე ვალდებულებას კისრულობს მომდევრო წლის საბიუჯეტო დეფიციტი შეზღუდოს მთლიანი შიდა პროდუქტის (მშპ) 3 პროცენტამდე. ხელისუფლება კისრულობს ვალდებულებას გაატაროს სტრუქტურული რეფორმები, ეკონომიკური ზრდის დაჩქარებისა და ინკლუზიურობის უზრუნველსაყოფად. ამავდროულად გააძლიეროს ქვეყნის წარმატებული, ინფლაციის ტარგეტირებაზე ორიენტირებული მონეტარული პოლიტიკა და გაცვლითი კურსის მოქნილობა, რათა შენარჩუნდეს სავალუტო რეზერვების ძლიერი პოზიცია.
საქართველოს ხელისუფლების მიერ ნაკისრი ვალდებულებების გათვალისწინებით საერთაშორისო სავალუტო ფონდის მისია რეკომენდაციას უწევს პროგრამის პირველი მიმოხილვის დასრულებას. საერთაშორისო სავალუტო ფონდის ხელმძღვანელობის მიერ დადებითი შეფასების შემთხვევაში, აღმასრულებელი საბჭოს სხდომა საქართველოს პროგრამის განსახილველად მიმდინარე წლის დეკემბერში შედგება", - აცხადებს საქართველოში საერთაშორისო სავალუტო ფონდის მისიის უფროსი მარკ გრიფიტსი.
