რუსეთსა და ოკუპირებული აფხაზეთის მთავრობას შორის დაგეგმილ ხელშეკრულებას, პარლამენტის ფრაქცია "ქართული ოცნების" წევრი ზვიად კვაჭანტირაძე აფასებს. მისი თქმით, სამწუხაროა, რომ მარიონეტულ მთავრობას საშუალება ეძლევა განახორციელოს დამპყრობელი ქვეყნის მიზნები.
"დღეს ხელი ეწერება ხელშეკრულებას ხაჯიმბასა და პუტინს შორის. არ უნდა განვიხილოთ იგი, როგორც აფხაზებსა და რუსებს შორის დადებული ხელშეკრულება, უპირველესად იმიტომ, რომ იგი წინაააღმდეგობაშია ნებისმიერ საერთაშორისო კანონმდებლობასთან.
სამწუხაროდ, დღევანდელი დღე შავ ლაქად დარჩება აფხაზი ხალხის ისტორიაში, რადგან მარიონეტულ მთავრობას საშუალება ეძლევა განახორციელოს დამპყრობელი ქვეყნის მიზნები და ამოცანები, რომელიც მდგომარეობს შემდეგში - აფხაზეთი, აფხაზების გარეშე", - განაცხადა კვაჭანტირაძემ.
შეგახსენებთ, დღეს სოჭში რუსეთის ფედერაციის პრეზიდენტისა და ოკუპირებული აფხაზეთის ე. წ. პრეზიდენტის რაულ ხაჯიმბას შეხვედრა იგეგმება. მათი შეხვედრის მიზანი რუსეთსა და აფხაზეთს შორის ურთიერთთანამშრომლობის შესახებ ხელშეკრულების პროექტის ხელმოწერაა.
