საგარეო საქმეთა სამინისტროში გაიმართა საგარეო საქმეთა მინისტრიs თამარ ბერუჩაშვილის შეხვედრა საქართველოში ევროკავშირის წარმომადგენლობის ხელმძღვანელთან, ელჩთან იანუშ ჰერმანთან.
ევროკავშირის წარმომადგენლობის ხელმძღვანელმა აღნიშნა, რომ თამარ ბერუჩაშვილის საქართველოს საგარეო საქმეთა მინისტრის თანამდებობაზე დანიშვნა ძალიან დადებითად იქნა აღქმული ევროკავშირის მიერ, რადგან მისი პერსონიდან გამომდინარე, აღნიშნული ნაბიჯი იყო მკაფიო გზავნილი ევროკავშირისთვის, რომ საქართველო არამარტო გააგრძელებს ევროპულ და ევროატლანტიკურ კურსს არამედ უფრო ინტენსიურს გახდის ქვეყნის ევროინტეგრაციის პროცესს.
ელჩთან საუბარში საგარეო საქმეთა მინისტრმა კიდევ ერთხელ დაადასტურა, რომ საქართველოს ევროპული და ევროატლანტიკური კურსი უცვლელია და მას ალტერნატივა არ გააჩნია. მისი განცხადებით, საქართველოს ხელისუფლების მიზანია ევროკავშირთან და მის წევრ ქვეყნებთან ურთიერთობები უფრო აქტიური დინამიკით გაგრძელდეს. თამარ ბერუჩაშვილმა ხაზგასმით აღნიშნა, რომ საქართველოს მთავრობის სურვილია იხილოს უფრო მეტი ევროკავშირი საქართველოში და მეტი საქართველო ევროკავშირში. მინისტრის განცხადებით, ამ კონტექსტში, განსაკუთრებით მნიშვნელოვანია ა.წ. 17 ნოემბერს დაგეგმილი ასოცირების საბჭოს პირველის სხდომის წარმატებით ჩატარება და სავიზო რეჟიმის ლიბერალიზაციის კუთხით კონკრეტული შედეგების დაფიქსირება.
შეხვედრისას მხარეებმა მიმოიხილეს საქართველო-ევროკავშირის თანამშრომლობის მიმდინარე პრიორიტეტები, მათ შორის:
· ასოცირების შეთანხმების დროებით ამოქმედება 1 სექტემბრიდან, რამაც სრულიად ახალი რეალობა შექმნა საქართველო-ევროკავშირის ურთიერთობებში.
· საქართველო-ევროკავშირის სავიზო რეჟიმის ლიბერალიზაციის სამოქმედო გეგმის პირველი ფაზის წარმატებით შესრულება და მეორე ფაზაზე გადასვლის მნიშვნელობა. შეხვედრაზე აღინიშნა, რომ ეს მნიშვნელოვანი წინგადადგმული ნაბიჯია ევროკავშირთან უვიზო მიმოსვლის რეჟიმის შემოღების მიმართულებით და საქართველოს მთავრობა მზადაა, ძალისხმევის შემდგომი გაგრძელებისა და თანამშრომლობის ინტენსიფიკაციისათვის.

შეხვედრისას ყურადღება დაეთმო ევროკავშირის როლს საქართველოში კონფლიქტის მშვიდობიანი გადაწყვეტის თვალსაზრისით, მათ შორის ჟენევის მოლაპარაკებებში აქტიური ჩართულობისა და ევროკავშირის მონიტორინგის მისიის ფუნქციონირებით.
დასასრულს, იანოშ ჰერმანმა თამარ ბერუჩაშვილს წარმატებები უსურვა სამომავლო საქმიანობაში ახალ თანამდებობაზე. მხარეები შეთანხმდნენ, რომ გააგრძელებენ აქტიურ თანამშრომლობას საქართველოს ევროინტეგრაციის დღის წესრიგის წარმატებით განხორციელების მიზნით.

.