საპარლამენტო უმრავლესობის წევრ ზურაბ ტყემალაძის ინფორმაციით, "თავისუფალი დემოკრატების" წევრ ზურაბ აბაშიძის პარლამენტის ვიცე-სპიკერის პოსტიდან გამოიწვევის საკითხი, ამ ეტაპზე, არ განიხილება.
მისი თქმით, საკითხზე გადაწყვეტილება საპარლამენტო უმრავლესობამ უნდა მიიღოს.
როგორც უმრავლესობის დეპუტატები აცხადებენ, ვიცე-სპიკერებისა და საპარლამენტო კომიტეტების თავმჯდომარეების საკითხის განხილვას, მმართველი გუნდი, მომავალ კვირაში უმრავლესობის სხდომის ფორმატში მიუბრუნდება.
გავრცელებული ინფორმაციით, ზურაბ აბაშიძის შემცვლელად ფრაქცია"ქართული ოცნების თავმჯდომარე" გია ვოლსკი სახელდება, თუმცა ვოლსკი ამ ინფორმაცის არ ადასტურებს.
შეგახსენებთ, ზურაბ აბაშიძე პარლამენტში ვიცე-სპიკერის პოსტზე საპარლამენტო უმრავლესობის კვოტით გავიდა. მას შემდეგ, რაც ფრაქცია "თავისუფალი დემოკრატები" უმრავლესობას გამოეყო და ოპოზიციაში გადავიდა, უმრავლესობაში ზურაბ აბაშიძის პოსტიდან შესაძლო გამოწვევის საკითხი დადგა.
კანონის თანახმად, პარლამენტს სულ ხუთი ვიცე-სპიკერი ჰყავს, აქედან ერთს პარლამენტის თავმჯდომარე ასახელებს, ორს -ორის დანიშვნის უფლება უმრავლსესობასა და უმცირესობას აქვს,ხოლო ერთს, აჭარის ავტონომიურის რესპუბლიკის მაჟორიტარი დეპუტაციის უმრავლესობა ნიშნავს.
