პრეზიდენტი გიორგი მარგველაშვილი ,,მაესტროს" ეთერში ყოფილი პრემიერის ბიძინა ივანიშვილის მხრიდან მისი მისამართით გამოთქმულ კრიტიკას გამოეხმაურა და აღნიშნა, რომ ეს უკვე არის საქმიანი კრიტიკა, მიუღებლობა მისი საქმიანი გადაწყვეტილებების მიმართ.
,,ეს არის უკვე საქმიანი დიალოგი, რადგან აქამდე ჩვენს შორის ძირითადში იყო ხოლმე რაღაცა მითხრა, უთხარი, რაღაც ჭორის ფორმით იყო და ახლა ეს არის ჩემთვის უკვე მისაღები, საქმიანი კრიტიკა, მიუღებლობა ჩემი საქმიანი გადაწყვეტილებების. მე ვალდებული ვარ როგორც ბიძინა ივანიშვილს, ასევე თქვენ, მოქალაქეებს რომლებიც დასვამენ ამ კითხვას ვუპასუხო და შემიძლია ვთქვა, რომ ვეტო დავადე იმიტომ, რომ ასე მიმაჩნდა სწორედ. Eეს გადაწყვეტილება სხვათა შორის უბრალოდ არ მოსულა, რთული იყო. ამ ვითარების გარკვევაში ჩართული ვიყავი ბოლო ექვსი თვე და ვხვდებოდი იმ ჯგუფებს რომლებიც ამ საკითხს სწავლობდნენ. მიმაჩნია, რომ ეს არის სწორი და ეს ვეტო დასაბუთებული 16 ფურცელზე იყო. ვეტო მხარდაჭერილი იყო მთელი პოლიტიკური სპექტრის მიერ პარლამენტში", _განაცხადა პრეზიდენტმა.
მარგველაშვილმა ,,მაესტროს" ეთერში კიდევ ერთხელ განმარტა ის მიზეზები რის გამოც ე.წ. მოსმენების შესახებ კანონს ვეტო დაადო.
,,ჩვენ ვცხოვრობდით საზოგადოებაში სადაც ვიცოდით რომ გვისმენდნენ. ჩვენ სერიოზულად ვაპროტესტებდით ამას როდესაც ოპოზიციაში ვიყავით. გავიდა ორი წელი, შეიძლება პირველ ექს თვეში ვერ დაამთავრო, შეიძლება ცხრა თვეში ვერ დაამთავრო, მაგრამ ორ წელიწადში შენ უნდა შეცვალო სისტემა. Gგულწრფელად გეტყვით, ჩემი ღელვა და დარდი მხოლოდ იქიდან კი არ გამომდინარეობს, ეს ჩვენი პოლიტიკური ვალდებულებაა, არამედ სახელმწიფოდან გამომდინარეც და სამართალდამცავი ინსტიტუტებიდან გამომდინარე. თუ მოქალაქე თავის სამართლდამცავებს არ ენდობა, თუ მოქალაქე და სამართალდამცავი არ არიან თანამოაზრეები დაიცვან წესრიგი სახელმწიფოში, თუ ჩვენ გადავდივართ იგივე რეჟიმში რაშიც საბჭოთა კავშირის დროს ვცხოვრობდით, რომ ცალკეა საზოგადოება და ცალკე კაკებე, თუ ევედე, რომელიც შენთვის არის მტერი. ჩვენ უნდა დავაახლოვოთ საზოგადოება და სახელმწიფო. სამართალდამცავი არ უნდა გახდეს ის ადამიანი რომლის უკანონობის შეიძლება მოქალაქეს ეშინოდეს", _განაცხადა პრეზიდენტმა.
საქართველოს ყოფილი პრემიერის ბიძინა ივანიშვილის აზრით, პრეზიდენტმა გიორგი მარგველაშვილმა მოსმენებთან დაკავშირებულ კანონპროექტს ვეტო იმიტომ დაადო, რომ მას უნდოდა ეჩვენებინა, რომ ვეტოს დადება შეუძლია. ივანიშვილმა პარალელი გაავლო პრეზიდენტის ვეტოსა და მის მიერ ავსტრიაში გამართულ ბოლო ვიზიტს შორის და აღნიშნა, რომ ეს იყო „ვიზიტი ვიზიტისათვის", რადგან მარგველაშვილს ვიზიტები უყვარს.
„პრეზიდენტმა, ჩემი აზრით, ეს ვეტო დაადო იმიტომ, რომ ვეტოს დადების სურვილი გააჩნდა. ეს იკვეთება - მას უნდა აჩვენოს, რომ ვეტოს დადება შეუძლია. მე პარალელს ვაკეთებ პრეზიდენტის ვეტოს აუცილებლობასა და მის ბოლო ვიზიტთან ავსტრიაში. როგორც მე წავიკითხე, ის იმყოფებოდა ზღვაზე გასასვლელის არმქონე განვითარებადი ქვეყნების გაერო-ს მეორე კონფერენციაზე. საბედნიეროდ, ზღვაც გვაქვს და ზღვაზე გასასვლელიც. ვიზიტები უყვარს ძალიან და გახსოვთ, ვიზიტებზე მისი რამდენი სკანდალი იყო და ჩემი აზრით, ავსტრიაში ამ კონფერენციაზე ვიზიტისთვის წავიდა, როგორც ვიზიტი ვიზიტისთვის, რადგან მას ვიზიტები მოსწონს და ბევრი სკანდალები გააკეთა, ამგვარი იყო ვეტო ვეტოსთვის. მან განაცხადა, რომ კონკურენციაში უნდა იყოს მთავრობასა და პარლამენტთან, ეს საბუთდება. მე მინდა, რომ აქ ერთი პარალელი გავავლო და შევახსენო, პრეზიდენტსაც და მის ადვოკატებსაც, რომლებიც მის ქცევებზე ჩემს მიერ გაკეთებულ აქცენტებს მასზე თავდასხმად ასახელებენ - არც ერთ მოვლენაზე, არცერთ მის ქმედებაზე, რომელზეც მე გავაკეთე აქცენტი, ახსნა არ მიუციათ არც მას და არც მის ადვოკატებს. პრეზიდენტის სასახლეში შესვლაზე გავაკეთე აქცენტი და პრეზიდენტის ინსტიტუტს ასუსტებს და როგორ გაბედა, - მისი ადვოკატები ამბობენ. ამ დროს, კითხვაზე ახსნა არავინ გააკეთა, რომ იქ 2-3 მილიონი წელიწადში ზედმეტი იხარჯება; მეორე - პროკურატურის თხოვნის მიუხედავად სამჯერ ერთი თვის განმავლობაში, სააკაშვილის უკანონოდ დადებული გრიფით საიდუმლო მის ხარჯებზე არ მოუხსნა, სანამ საჯარო არ გახადა ეს პროკურატურამ. ეს ყველაფერი, გაგებით თუ გაუგებრად, „ნაციონალური მოძრაობის" ინტერესებში ჯდება მთლიანად - სასახლეში შესვლა, რომ გრიფს არ ხსნის, რომ ასეთ კონკურენციაშია მთავრობასთან. მე არ მაქვს დიდი ეჭვები, რომ „ნაციონალურ მოძრაობასთან" მეგობრობს, მაგრამ მისი ქმედება და „ნაციონალური მოძრაობის" ქმედება და ინტერესები ძალიან დიდ თანხვედრაში მოდის. ახლა გამოვლენ და იტყვიან, რომ - „აი, პრეზიდენტს თავს ესხმის, როგორ ბედავს, პრეზიდენტის ინსტიტუტს ასუსტებს". პრეზიდენტის ინსტიტუტს ასუსტებს თვითონ მისი ქმედება", - განაცხადა ივანიშვილმა „მოამბის" პირდაპირ ეთერში საუბრისას.
