,,ყავას ვსვამდით მე და ირაკლი არაფერი არ ყოფილა", _განაცხადა დეპუტატმა გედევან ფოფხაძემ თავდაცვის ყოფილ მინისტრ ირაკლი ალასანიასთან შეხვედრის შემდეგ.
მისივე განცხადებით, გადაწყვეტილება დატოვებს თუ არა უმრავლესობის რიგებს ჯერ არ მიუღია.
,,ამ კონკრეტულ შემთხვევაში ჯერჯერობით არაფერს არ ვამბობ იმიტომ რომ მე მაქვს შეხვედრები იმ ადამიანებთან ვის აზრსაც ანგარიშს ვუწევ. მიმაჩნია რომ ადამიანმა გადაწყვეტილება უნდა მიიღო მშვიდად, წყნარად და არა ასე მოწოლით და როცა მიკროფონებს გაჩრიან და აი ახლა მოიფიქრე სწორი პასუხი. იცი რას გეტყვი?_ ერთი წუთი რომ მაქვს იმ ,, რა სად როდის" ისაა პრობლემა, თორემ მე რომ ათი წუთი მქონდეს შეიძლება ყველა კითხვა გამოვიცნო. ამიტომ არ მინდა ასეთ ცაიტნოტში კამერების წინაშე ფიქრი", _განაცხადა ფოფხაძემ.
ყოფილი თავდაცვის მინისტრი და ,,თავისუფალი დემოკრატების" ლიდერი ირაკლი ალასანია დეპუტატ გედევან ფოფხაძეს სასტუმრო "თბილისი მარიოტში" შეხვდა.
იმ შემთხვევაში, თუ გედევან ფოფხაძე თანაპარტიელების მსგავსად დატოვებს საპარლამენტო უმრავლესობას, კოალიცია "ქართული ოცნება" უმრავლესობას დაკარგავს. დარჩენის შემთხვევაში კი კოალიცია უმრავლესობას შეინარჩუნებს.
