ჩვენს მიერ მიღწეული შედეგები საფრთხის ქვეშა, - განაცხადა საქართველოს საგარეო საქმეთა ყოფილმა მინისტრმა საგანგებო ბრიფინგზე, სადაც მან გადადგომის შესახებ განცხადება გააკეთა.
მისი თქმით, მან და მისმა გუნდმა ქვეყნის საგარეო პოლიტიკურ ასპარეზზე შესაძლებლობების მაქსიმუმს მიაღწია.
"ყალბი თავმდაბლობის გარეშე ვიტყვი, რომ გასული ორი წლის განმავლობაში ჩვენმა გუნდმა ქვეყნის საგარეო პოლიტიკურ ასპარეზზე მიაღწია შესაძლებლობების მაქსიმუმს. ჩვენ მტკიცედ ვიდექით ევროპული და ევროანტლანტიკური ფასეულობების დასაცავად. მნიშვნელოვან წარმატებებს მივაღწიეთ საგარეო პოლიტიკის ყველა პრიორიტეტული მიმართულებით. შევქმენით ევროპული და ევროატლანტიკური მისწრაფებების თვისობრივად ახალი მოდელი. ხელი მოეწერა და ამოქმედდა ევროკავშირთან ასოცირების შეთანხმება. ნატომ მიიღო გადაწყვეტილება საქართველოსთან თანამშრომლობის არსებითი პაკეტის შემუშავების შესახებ. მნიშვნელოვან პროგრესს მივაღწიეთ არაღიარების პოლიტიკის მიმართულებით და ორი სახელმწიფოთი შევამცირეთ არაღიარებათა რიცხვი. გაიზარდა გაეროში რეზოლუციათა მხარდამჭერთა რაოდენობა", - განაცხადა ყოფილმა მინისტრმა.
„ნამდვილად არ მეგონა, რომ ამის გაკეთება ასეთ ვითარებაში მომხდებოდა. რადგან ჩვენ ვხედავთ, რომ არა თუ ჩვენი მომავალი საქმიანობა, არამედ ჩვენს მიერ მიღწეული შედეგებიც არის საფრთხის ქვეშ, ამიტომ, მივიღეთ გადადგომის გადაწყვეტილება", - განაცხადა მან და აღნიშნა, რომ ქვეყნის ევროპული და ევროატლანტიკური კურსი, საქართველოს ევროპული მომავალი არის მოსახლეობის, ქართველი ხალხის არჩევანია.
