ჩემთვის არასასიამოვნოა, რომ თავდაცვის სამინისტროს მიმართ, რომელიც ჩვენი კომიტეტის საკურატორო უწყებაა, კიდევ ერთი ბრალია წარდგენილი, - ასე გამოეხმაურა პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი თავდაცვის სამინისტროს რამდენიმე თანამშრომლისთვის, სამხედროების კვებითი უზრუნველყოფის საქმეზე, წარდგენილ ბრალდებას.
სესიაშვილი მოუწოდებს კოლეგებს, გადაწყვეტილება ცხელ გულზე არ მიიღონ.
"მესმის შექმნილი ვითარება ძალიან რთულია. მოვუწოდებ ჩემს კოლეგებს, მეგობრებს, ცხელ გულზე ნუ მიიღებენ ისეთ გადაწყვეტილება, რომელიც ავნებს კოალიციას, ჩვენს ერთობას. ჩვენ ძალიან ბევრი რამ გვაერთიანებს, პირველ რიგში ბრძოლა უკეთესი ქვეყნისთვის და ეს ჩვენ დავამტკიცეთ", - განაცხადა სესიაშვილმა და აღნიშნა, რომ თავდაცვის სამინისტროს საზოგადოებისგან, პარლამენტისა და კოალიციისაგან, სრული ნდობა აქვს.
შეგახსენებთ, დღეს პრემიერ-მინისტრი ირაკლი ღარიბაშვილი საპარლამენტო უმრავლესობას შეხვდება. შეხვედრა, 18:00 საათზე, კოალიცია „ქართული ოცნების" ცენტრალურ ოფისში გაიმართება.
18:00 საათზე დანიშნა ასევე, საგანგებო ბრიფინგი „თავისუფალი დემოკრატების" გუნდის წევრებთან ერთად, თავდაცვის მინისტრმა ირაკლი ალასანიამ.
