ექსპერტი უსაფრთხოების საკითხებში ხათუნა ლაგაზიძე მიიჩნევს, რომ იმ შემთხვევაში თუ პროკურატურა თავდაცვის სამინისტროს თანამშრომლებისთვის ბრალის დამტკიცებას ვერ მოახერხებს, ეს იქნება უზარმაზარი პოლიტიკური სკანდალი. როგორც ლაგაზიძემ ,,პრაიმ ტაიმის" პრესკლუბში განაცხადა აღნიშნული იქნება მაგალითი იმის რომ თავდაცვის მინისტრზე პოლიტიკური დევნის პროცესი დაიწყო.
"თუ პროკურატურა ბრალის დამტკიცებას ვერ მოახერხებს, ეს იქნება უზარმაზარი პოლიტიკური სკანდალი და იმის პირდაპირი მტკიცებაა, რომ ალასანიას მიმართ პოლიტიკური დევნის პროცესი დაიწყო. თავდაცვის სამინისტრო არის უწყება, რომელზეც ქვეყნის უსაფრთხოება დგას. ნატო-საქართველოს ურთიერთობის მთავარი პრიორიტეტები სწორედ ამ სამინისტროზე გადის. თუ კი ამ პროცესებს აქვს პოლიტიკური სარჩული, ეს იქნება უპასუხისმგებლო დამოკიდებულება საქართველოს უსაფრთხოებაზე", - აცხადებს ლაგაზიძე.
შეგახსენებთ, რომ თავდაცვის სამინისტროს ხუთ მაღალჩინოსანს გამოძიება სატენდერო პირობების დარღვევით სახელმწიფო ბიუჯეტის კუთვნილი თანხის გაფლანგვას ედავება. საუბარია, დაახლოებით, ოთხ მილიონ ლარზე.
არც ერთი ბრალდებული დანაშაულს არ აღიარებს.
საქმეს გრიფით საიდუმლო ადევს. მასალები დაცვის მხარეს ამ დრომდე არ გადასცემია.
