სანკტ-პეტერბურგში სტივენ ჯობსის მემორიალის დემონტაჟი განხორციელდა. iPhone-ის გიგანტური მონუმენტი ინფორმაციული ტექნოლოგიების უნივერსიტეტის ეზოს ამშვენებდა, თუმცა სასწავლებლის ხელმძღვანელობამ მისი აღების გადაწყვეტილება მიიღო. მონუმენტის დემონტაჟის მიზეზად უნივერსიტეტის რექტორი ორ მიზეზს ასახელებს. პირველი მიზეზი კომპანია Apple-ს ახალი ხელმძღვანელის, ტიმ კუკის აღიარება გახდა, რომლის მიხედვითაც ის არატრადიციული სექსუალური ორიენტაციისაა. მეორე მიზეზი კი ამერიკის დაზვერვის სამსახურის ყოფილი აგენტის, ედვარდ სნოუდენის მიერ გასაჯაროებული მტკიცებულებებია, რომლის მიხედვითაც, ამერიკული სპეცსამსახურები უკანონო მოსმენებს სწორედ Apple-ს მიერ წარმოებული პროდუქციით ახორციელებდნენ. სტივენ ჯობსის ხსოვნის პატივსაცემად სანკტ-პეტერბურგში iPhone-ის მონუმენტი გასული წლის იანვარში დადგეს. გიგანტურ iPhone სენსორული ინტერაქტიული ეკრანით იყო აღჭურვილი, რომელზეც Apple-ს დამფუძნებლის შესახებ დეტალური ინფორმაცია იყო დატანილი.
მასალის გამოყენების პირობები