"ერთიანი ნაციონალური მოძრაობა" პრეზიდენტს მიმართავს და მოუწოდებს, სოციალური რეკლამის შესახებ კანონს ვეტო დაადო, რადგან მათი თქმით, ახალი რეგულაციები ლახავს კერძო მაუწყებლების ფინანსურ და სარედაქციო დამოუკიდებლობას და ქმნის მედიაზე ზეწოლის რეალურ ბერკეტებს.
უმცირესობის განცხადებით, პარლამენტმა არ გაითვალისწინა არასამთვრობო ორგანიზაციებისა და სამაუწყებლო გაერთიანებების რეკომენდაციები, რომლებიც ამ კანონის განხილვის შეჩერებისა და სპეციალური სამუშაო ჯგუფის შექმნას ითხოვდნენ.
"ნაციონალური მოძრაობა" კანონის მიღების შემთხვევაში საკონსტიტუციო სასამართლოს მიმართავს.
"ჩვენ კანონპროექტის განხილვის პროცესში არაერთხელ დავაფიქსირეთ საკუთარი უარყოფითი პოზიცია და კანონპროექტის განხილვის შეჩერება მოვითხოვთ. აღსანიშნავია ასევე, რომ კანონპროექტს უმრავლესობის წევრთა გარკვეულმა ნაწილმაც არ დაუჭირა მხარი.
მივმართავთ საქართველოს პრეზიდენტს, გაიაროს ამ საკითხთან დაკავშირებით კონსულტაციები მედიასაშუალებებისა და არასამთავრობო სექტორის წარმომადგენლებთან, გამოიყენოს კანონით მისთვის მინიჭებული უფლებები და დაადოს ამ კანონს ვეტო.
ჩვენი მხრივ, ამ კანონის მიღების შემთხვევაში გავასაჩივრებთ საკონსტიტუციო სასამართლოში, რადგან მიგვაჩნია, რომ ამ კანონით ირღვევა საქართველოს კონსტიტუცია", - აცხადებენ "ნაციონალური მოძრაობა" - ში.
