საგარეო საქმეთა მინისტრი, მაია ფანჯიკიძე თავდაცვის სამინისტროს თანამშრომლების დაკავებას გამოეხმაურა და აღნიშნა, რომ იგი დარწმუნებულია თავდაცვის მინისტრის ირაკლია ალასანიას პოზიციაში.
,,თავდაცვის მინისტრი ენდობა თავის თანამშრომლებს, დარწმუნებულია მათ უდანაშაულობაში. მე დარწმუნებული ვარ თავდაცვის მინისტრის პოზიციაში და იმაში, ზუსტად იცის, რასაც ამბობს", - განაცხადა ფანჯიკიძემ მთავრობის სხდომის შემდეგ.
შეგახსენებთ, რომ თავდაცვის მინისტრი ირაკლი ალასანია მისი უწყების თანამშრომლებს მხარდაჭერას უცხადებს და განმარტავს, რომ მათ უდანაშაულობაში ეჭვი არ ეპარება.
თავდაცვის სამინისტროს ხუთ მაღალჩინოსანს გამოძიება სატენდერო პირობების დარღვევით სახელმწიფო ბიუჯეტის კუთვნილი თანხის გაფლანგვას ედავება. საუბარია, დაახლოებით, ოთხ მილიონ ლარზე.
არც ერთი ბრალდებული დანაშაულს არ აღიარებს.
საქმეს გრიფით საიდუმლო ადევს. მასალები დაცვის მხარეს ამ დრომდე არ გადასცემია.
