თბილისის ვიცე-მერის ალექსანდრე მარგიშვილის შეფასებით, მერიის ზოგიერთი თანამშრომლის ტესტირების პროცესზე გამოუცხადებლობა პროცესისადმი მათ უნდობლობას არ უკავშირდება.
მარგიშვილი თქმით, სავარაუდოდ, აღნიშნულმა პირებმა საკუთარ შესაძლებლობაში ეჭვი შეიტანეს და გამოცდაზე ამ მიზეზით არ გამოცხადდნენ.
როგორც მარგიშვილმა მერიაში ჟურნალისტებთან საუბრისას განაცხადა, მერიის თანამშრომელთა ტესტირების პროცესი ნორმალურ, მუშა რეჟიმში მიმდინარეობს.
მან ასევე, უარყო "ნაციონალური მოძრაობის" ბრალდება, რომ ტესტები გამოცდების ეროვნული ცენტრის მიერ არ არის მომზადებული და ტესტირება თანამშრომელთა გასათავისუფლებლად ტარდება.
მარგიშვილის განმარტებით, იმ პირებს, რომლებიც ტესტირებას ვერ გაივლიან, შეეძლებათ, ტესტირების შედეგები ერთი კვირის ვადაში, გამოცდების ეროვნულ ცენტრში, შემდეგ კი, თბილისის მერიაში გააპროტესტონ. სწორედ ერთი კვირის ვადაში ჩატარდება ტესტირების მეორე ეტაპი - გასაუბრება.
ტესტირებაში მონაწილეთა პირველი ნაკადის რეგისტრაცია დილის 9 საათზე დაიწყო, რეგისტრაციის პროცესი ერთ საათს გაგრძელდა, ტესტებზე მუშაობა კი, აპლიკანტებმა 10 საათზე დაიწყეს.
ტესტირებაზე დედაქალაქის მუნიციპალიტეტის 36 თანამშრომელი არ გამოცხადდა, ერთი კი, დაგვიანების გამო, არ დაიშვა.
