პარლამენტის თავმჯდომარე დავით უსუფაშვილი საქართველოში ვიზიტად მყოფ ირანის ისლამური რესპუბლიკის მეჯლისის საქართველოსთან მეგობრობის ჯგუფის დელეგაციას შეხვდა.
შეხვედრაზე მხარეებმა რეგიონის სპეციფიკიდან გამომდინარე საკითხების ფართო სპექტრი განიხილეს და ისეთ თემებზე იმსჯელე,ს როგორიცაა უსაფრთხოება, ენერგეტიკული პროექტები და ეკონომიკური თანამშრომლობა.
„ევროკავშირთან ასოცირების ხელშეკრულების ხელმოწერის შემდეგ ირანის დაინტერესება საქართველოს მიმართ კიდევ უფრო გაიზარდა. საუბარია იმაზე, რომ საქართველო იყოს შემაერთებელი ხიდი აღმოსავლეთსა და დასავლეთს, კასპიის ზღვის და შავის ზღვის აუზის ქვეყნებს შორის. ეს არის ირანის ბუნებრივი ინტერესი და ჩვენი სტრატეგიული ამოცანა, რათა საქართველომ სწორედ ასეთი ფუნქციის შეძენა მოახერხოს. შეხვედრაზე შევთანხმდით, რომ მრავალსაუკუნოვანი ურთიერთობები ორ ქვეყანას შორის ძალიან კარგი ფუნდამენტია, მაგრამ არ არის საკმარისი იმისთვის, რომ დღეისთვის ურთიერთსასარგებლო ურთიერთობები ავაწყოთ. ჩვენ გვჭირდება 21-ე საუკუნის შესაფერისი თანამშრომლობა, როდესაც გვექნება იმის გააზრება, რომ გავითვალისწინოთ ერთმანეთის სტრატეგიული ინტერესები და საფრთხეები და ეს დღეისათვის ასეც არის. ირანელ კოლეგებს მოვახსენე, რომ საქართველო დიდი ყურადღებით და კმაყოფილებით ადევნებს თვალს ირანსა და დასავლეთს შორის არსებული პრობლემების მოგვარების პოზიტიურ დინამიკას. შეხვედრაზე ირანელმა კანონმდებლებმა რიგ თემებზე ერთობლივი მუშაობა შემოგვთავაზეს, როგორიცაა, ტერორიზმის წინააღმდეგ ბრძოლა და მასთან გამკლავება, ქალთა პრობლემები და მათი უფლებების დაცვა. ეს ის თემატიკაა, რაზეც მსჯელობა წლების წინ წარმოუდგენელი იყო", - განაცხადა დავით უსუფაშვილმა შეხვედრის დასასრულს. მისივე ინფორმაციით, დეკემბრის დასაწყისში ოფიციალური ვიზიტით იგი თავად ეწვევა ირანის რესპუბლიკას, სადაც საპარლამენტო ურთიერთობების დონეზე სხვადასხვა საკითხის შეჯერება-შეჯამება მოხდება.
საპასუხო ვიზიტად მყოფმა ირანელ კანონმდებელთა დელეგაციამ სამი დღის განმავლობაში უმაღლესი დონის შეხვედრები საკანონმდებლო და აღმასრულებელი ხელისუფლების წარმომადგენლებთან გამართეს.
