დღეს, 30 ოქტომბერს, საგარეო საქმეთა სამინისტროში გაიმართება აშშ-საქართველოს სტრატეგიული პარტნიორობის ქარტიის ეკონომიკის, ენერგეტიკისა და ვაჭრობის სამუშაო ჯგუფის მორიგი, რიგით მე-7 შეხვედრა. ქარტიის სამუშაო ჯგუფის შეხვედრაზე საუბარი შეეხება ორ ქვეყანას შორის სავაჭრო-ეკონომიკურ თანამშრომლობასთან დაკავშირებული თემებს. კერძოდ, შეხვედრაზე იმსჯელებენ რეგიონში საქართველოს ეკონომიკური როლის ზრდის, სოფლის მეურნეობის სფეროში ორმხრივი თანამშრომლობის, ინტელექტუალური საკუთრების უფლებების, სახელმწიფო და კერძო სექტორების ჩართულობის, ენერგეტიკული უსაფრთხოებისა და ინფრასტრუქტურული განვითარების საკითხებზე.

სამუშაო ჯგუფს ქართული მხრიდან უხელმძღვანელებენ: საგარეო საქმეთა მინისტრის პირველი მოადგილე, დავით ზალკალიანი და ეკონომიკისა და მდგრადი განვითარების მინისტრის მოადგილე, მიხეილ ჯანელიძე. ამერიკული მხრიდან შეხვედრის თანათავმჯდომარეები იქნებიან სახელმწიფო მდივნის თანაშემწის პირველი მოადგილე, კურტ ტონგი და აშშ-ის განვითარების საერთაშორისო სააგენტოს ადმინისტრატორის მოადგილე, ჯონათან კაცი. სამუშაო ჯგუფის შეხვედრამდე, 29 ოქტომბერს, საგარეო საქმეთა სამინისტროში ასევე გაიმართება ორმხრივი შეხვედრა დავით ზალკალიანსა და კურტ ტონგს შორის.

ქარტიის სხდომამდე, 28 ოქტომბერს, საგარეო საქმეთა სამინისტროში გაიმართა ვიდეო-კონფერენცია აშშ-ის სავაჭრო წარმომადგენლის ოფისთან. ვიდეო-კონფერენცია მიეძღვნა საქართველოსა და აშშ-ის შორის ორმხრივი სავაჭრო-ეკონომიკური ურთიერთობების გააქტიურების კუთხით გადასადგმელ შემდგომ ნაბიჯებს, ასევე ექსპერტების დონეზე რეგულარული შეხვედრების ორგანიზებისთვის დღის წესრიგის შემუშავებას სხვადასხვა მნიშვნელოვანი მიმართულებებით, მათ შორის, საქართველოსა და აშშ-ს შორის არსებული ვაჭრობისა და ინვესტიციების თაობაზე მაღალი დონის დიალოგის გააქტიურების მიზნით.