ევროკომისიამ დღეს დაამტკიცა საქართველოს მიერ სავიზო რეჟიმის ლიბერალიზაციის სამოქმედო გეგმის განხორციელების მეორე ანგარიში.
ანგარიშის მიხედვით, საქართველო აკმაყოფილებს სავიზო დიალოგთან დაკავშირებულ პირველი ფაზის ფარგლებში დაყენებულ მოთხოვნებს. შესაბამისად, დასაშვებია გაიხსნას მეორე ფაზა, რომელიც ითვალისწინებს კომისიის მიერ შესრულებული მოთხოვნების პრაქტიკაში იმპლემენტაციის ხარისხის შემოწმებას.
"კმაყოფილი ვარ ჩვენი შეფასების ანგარიშით და მსურს მივულოცო საქართველოს ხელისუფლებას მათი ძალისხმევით მიღწეული შედეგი. მათ გამოიჩინეს შესანიშნავი ნება საჭირო საკანონმდებლო ცვლილებების განხორციელების საქმეში. ეს არის მნიშვნელოვანი მიღწევა, მნიშვნელოვანი ნაბიჯი იმ პროცესში, რომელიც საქართველოს დაახლოებს თავის მიზანთან, მიიღოს ევროკავშირთან უვიზო რეჟიმი" - განაცხადა ევროკომისარმა სესილია მალმსტრომმა.
ევროკომისიის ბოლო ანგარიშის შემდეგ (2013 წლის ნოემბერი, IP / 13/1085), საქართველომ მიიღო კანონები უსაფრთხო დოკუმენტების, თავშესაფრის უფლების, ანტიკორუფციისა და ფულის გათეთრების მიმართულებით, ისევე, როგორც სხვა ზომები, გამოვლენილი საკანონმდებლო ხარვეზების გამოსასწორებლად. მნიშვნელოვანი ცვლილებები განხორციელდა პერსონალური მონაცემების დაცვის კანონმდებლობაში 2014 წლის ზაფხულში, გარდა ამისა მიღებულ იქნა და ძალაში შევიდა ანტიდისკრიმინაციული კანონი, რაც ასევე ადასტურებს საქართველოს ერთგულებას სავიზო რეჟიმის ლიბერალიზაციის დიალოგისადმი.
„ჩვენ ველით, რომ საქართველოს ხელისუფლება გააგრძელებს მუშაობას ამ მიმართულებით, რა მიზნითაც მეორე ფაზის ფარგლებში მოხდება წინა ფაზის პროცესში მიღებული ნორმების პრაქტიკაში იმპლემენტაციის მონიტორინგი დადგენილი კრიტერიუმების შესაბამისად", - ნათქვამია ევროკომისიის ანგარიშში.
კომისია ადასტურებს თავის მზადყოფნას, დაეხმაროს საქართველოს საკანონმდებლო, ინსტიტუციონალური ცვლილებების განხორციელებაში.