პარლამენტის საგარეო ურთიერთობათა კომიტეტის თავმჯდომარე თედო ჯაფარიძე ჟენევის მოლაპარაკებებში "ნაციონალური მოძრაობის" ჩართვას ითხოვს. წინადადება ჯაფარიძემ პარლამენტში, კომიტეტების გაერთიანებულ სხდომაზე დააყენა, სადაც დეპუტატებმა რუსეთის ფედერაციასა და ოკუპირებულ აფხაზეთის მთავრობას შორის დაგეგმილ ხელშეკრულებასა და ჟენევის მოალპარაკებების 29-ე რაუნდზე იმსჯელეს.
"იქნებ გვეფიქრა, მათაც მიიღონ მონაწილეობა მოლაპარაკებებში, თუკი ამის საშუალებას ფორმატი იძლევა. თუნდაც ბატონმა ჭიაბერაშვილმა", - განაცხადა ჯაფარიძემ.
მისი თქმით, ოპოზიციაში არიან ადამიანები, რომელთაც გააჩნიათ კომპეტენცია და მონაწილეობა აქვთ მიღებული ჟენევის მოლაპარაკებებში.
საგარეო ურთიერთობათა კომიტეტის თავმჯდომარეს დავით ზალკალიანმა უპასუხა. საგარეო საქმეთა მინისტრის მოადგილის განმარტებით, ჟენევის მოლაპარაკებების ფორმატი უმცირესობის ჩართვას არ ითვალისწინებს.
კომიტეტების დღევანდელ, გაერთიანებულ სხდომას "ნაციონალური მოძრაობიდან" შოთა უტიაშვილი და ზურაბ ჭიაბერაშვილი ესწრებოდნენ. სხდომაზე ასევე, მოწვეულნი იყვნენ, აღმასრულებებლი ხელისუფლებისა და აფხაზეთის მთავრობის წარმომადგენლები.
