საქართველოს პარლამენტის თავმჯდომარე დავით უსუფაშვილი ლიტვის რესპუბლიკის საგარეო საქმეთა მინისტრს, ლინას ლინკევიჩუსს შეხვდა.
დავით უსუფაშვილმა ლინას ლინკევიჩუსს საქართველოში ჩამობრძანებისთვის მადლობა გადაუხადა და აღნიშნა, რომ ეს კიდევ ერთხელ ადასტურებს საქართველოსა და ლიტვას შორის მეგობრობას და თანამშრომლობას.
ლიტვის რესპუბლიკის საგარეო საქმეთა მინისტრმა ხაზგასმით აღნიშნა, რომ ლიტვა ყურადღებით ადევნებს თვალს საქართველოში განვითარებულ მოვლენებს და მუდმივად ეძებს გზებს საქართველოსთვის დახმარების გასაწევად.
მისივე თქმით, საქართველოს ხშირად სტუმრობენ ლიტველი ექსპერტები, რომლებიც თავიანთ გამოცდილებას ქართველ კოლეგებს უზიარებენ. შეხვედრაზე ისაუბრეს უსაფრთხოების საკითხებისა და საქართველოს მიერ მიღებულ NATO - სთან გაძლიერებული თანამშრომლობის პაკეტის შესახებაც. როგორც ლინას ლინკევიჩუსმა აღნიშნა, ყველა ის დეტალი, რომელიც აღნიშნული პაკეტითაა გათვალისწინებული, სწრაფად და ეფექტურად უნდა იქნას იმპლემენტირებული. ასევე, საუბრის ერთ-ერთი მთავარი თემა იყო აფხაზეთის ანექსიის მცდელობა რუსეთის მიერ, უკრაინაში განვითარებული მოვლენები და რეგიონში არსებული საფრთხეები.
შეხვედრაზე აღინიშნა, რომ ასეთი გამოწვევების წინაშე ევროპული საზოგადოება ერთსულოვანი უნდა იყოს. ლიტვის რესპუბლიკის საგარეო საქმეთა მინისტრის განცხადებით, ამ გამოწვევებთან გასამკლავებლად პროაქტიული მიდგომაა საჭირო.
„ვისაუბრეთ პოლიტიკურ და სამხედრო-პოლიტიკურ საკითხებზე. საუბარი შეეხო უელსის სამიტზე მიღებული პაკეტის მომავალი იმპლემენტაციის საკითხებსაც და ამასთან დაკავშირებით სრული მხარდაჭერა აღგვითქვეს, ისევე, როგორც ევროკავშირთან ღრმა და ყოვლისმომცველი თავისუფალი სავაჭრო სივრცის შეთანხმებისა და ევროკავშირთან ასოცირების ხელშეკრულების განხორციელებისა და იმპლემენტაციის საკითხებში", - აღნიშნა შეხვედრის დასრულების შემდეგ ჟურნალისტებთან საუბრისას ევროპასთან ინტეგრაციის კომიტეტის თავმჯდომარე ვიქტორ დოლიძემ.
ლიტვის რესპუბლიკის საგარეო საქმეთა მინისტრთან შეხვედრას პარლამენტის თავმჯდომარის მოადგილე და საპარლამენტო უმცირესობის წევრი გიორგი ბარამიძე, ევროპასთან ინტეგრაციის კომიტეტის თავმჯდომარე ვიქტორ დოლიძე, საგარეო ურთიერთობათა კომიტეტის თავმჯდომარე თედო ჯაფარიძე და საქართველოს საგანგებო და სრულუფლებიანი ელჩი ლიტვაში ხათუნა სალუქვაძე ესწრებოდნენ.
