გერმანიის ფედერაციულ რესპუბლიკაში საქართველოს საგარეო საქმეთა მინისტრის სამუშაო ვიზიტის ფარგლებში „ფრიდრიხ ებერტის ფონდში" გაიმართა დისკუასია თემაზე „საქართველოს ევროპული ინტეგრაცია". ღონისძიების მონაწილეებს სიტყვით მიმართეს საქართველოს საგარეო საქმეთა მინისტრმა, მაია ფანჯიკიძემ, გერმანიის ფედერალური მთავრობის წარმომადგენელმა რუსეთთან და აღმოსავლეთ პარტნიორობის ქვეყნებთან ურთიერთობის საკითხებში გერნოტ ერლერმა და ებერტის ფონდის საერთაშორისო დიალოგის ოფისის ხელმძღვანელმა ალექსანდრ კალვაიტმა.
ღონისძიებაზე საკუთარი გამოსვლა მაია ფანჯიკიძემ საქართველოს ევროინტეგრაციულ პროცესებს და ამ მიმართულებით მიღწეულ წარმატებას დაუთმო. მან აუდიტორიის ყურადღება გაამახვილა ამ გზაზე არსებულ გამოწვევებსა და რისკებზე. კერძოდ, ისაუბრა რუსეთის მიერ აფხაზეთის საოკუპაიო რეჟიმისათვის შეთავაზებულ შეთანხმებაზე. მინისტრის შეფასებით ამ ნაბიჯით რუსეთი საქართველოს დასჯას გეგმავს, მისი ევროპული ინტეგრაციის გამო. მაია ფანჯიკიძემ საერთაშორისო საზოგადოებას მკვეთრი რეაგირებისკენ მოუწოდა. მისი შეფასებით საქართველოსთვის ევროპული პერსპექტივის გახსნა იქნებოდა სეროზული გზავნილი რუსეთისთვის.
რეგიონსა და საქართველოში არსებული ვითარება შეაფასა გერმანიის ფედერალური მთავრობის წარმომადგენელმა გერნოტ ერლერმა. მან ყურადღება გაამახვილა საქართველოს ევროინტეგრაციული კურსის შეუქცევადობაზე. „საქართველოს ევროპული ინტეგრაციის კურსი შეუჩერებელია. საქართველო ამ მხრივ არის განსაკუთრებული ქვეყანა და არ არსებობს ძალა, რომელსაც შეუძლია შემოატრიალოს ქვეყნის ევროინტეგრაცია"-განაცხად მან სიტყვით გამოსვლისას.
მაია ფანჯიკიძემ მადლობა გადაუხადა ფრიდრიხ ებერტის ფონდს საქართველოში საქმიანობისათვის და აღნიშნა მისი განსაკუთრებული წვლილი ქვეყანაში დემოკრატიის განმტკიცების საქმეში.
ებერტის ფონდში გამართულ დისკუსიას 200-მდე სტუმარი ესწრებოდა. გამომსვლელებმა ღონისძიების დასასრულს დამსწრე საზოგადოების შეკითხვებს უპასუხეს
