აჭარის მთავრობამ კომპანია „V&T Agro" დაკისრებული ჯარიმისგან გაანთავისუფლა და ვალდებულებების შესრულების ვადა გაუხანგრძლივა. როგორც აჭარის მთავრობაში განმარტავენ, კომპანია "V&P"-ს, 2011 წლის 6 იანვარს პირდაპირი მიყიდვის ფორმით საკუთრებაში გადაეცა ქობულეთში, სოფელ ხუცუბანში მდებარე 10 000 კვ/მ და 1001 კვ/მ სასოფლო-სამეურნეო დანიშნულების მიწის ნაკვეთები.
ხელშეკრულების მიხედვით, კომპანიას 2014 წლის 1 ივნისამდე საკუთრებაში გადაცემულ მიწის ნაკვეთიდან არანაკლებ 6200 კვ/მ სასოფლო-სამეურნეო დანიშნულების მიწის ნაკვეთზე თანამედროვე სტანდარტის სასათბურე მეურნეობა (კომპიუტერული მართვის სისტემით, მორწყვისა და მცენარეთა კვების ავტომატური რეჟიმით) და მასთან დაკავშირებული სერვის ზონა უნდა მოეწყო, რაშიც არანაკლებ 400 000 აშშ დოლარის ინვესტიცია უნდა განეხორციელებინა.
ასევე, პირობების მიხედვით, მყიდველი ვალდებული იყო ხელშეკრულების გაფორმებიდან არანაკლებ 20 წლის ვადაში, საკუთრებაში გადაცემული მიწის ნაკვეთები სასოფლო-სამეურნეო დანიშნულებით გამოეყენებინა და აღნიშნულ ნაკვეთებზე მხოლოდ სასოფლო-სამეურნეო საქმიანობისათვის საჭირო შენობა-ნაგებობანი აეშენებინა.
თუმცა შემდგომ, "V&P"-მა აჭარის ფინანსთა და ეკონომიკის სამინისტროს თანხმობით, 10 000 კვ/მ მიწის ნაკვეთი კომპანია "V&T Agro"-ზე ხელშეკრულებით გათვალისწინებული ვალდებულებების შესრულების პირობით გაასხვისა, რომელიც თავის მხრივ მომიჯნავედ მდებარე 12 169 კვ/მ-ს სასოფლო-სამეურნეო დანიშნულების მიწის ნაკვეთს ფლობდა.
აჭარის მთავრობის ინფორმაციით, "V&P" და "V&T Agro" იყვნენ ურთიერთდამოკიდებული საწარმოები, ამიტომ საზოგადოების პარტნიორთა გადაწყვეტილებით, კომპანიების შერწყმა მოხდა და ამჟამად "V&P"-ს უფლებამონაცვლეს წარმოადგენს "V&T Agro".
"აუდიტსერვისის" 2014 წლის 15 ივნისის აუდიტორული დასკვნის მიხედვით ირკვევა, რომ "V&T Agro"-ს მიერ 7000 კვ/მ მიწის ნაკვეთზე განხორციელებულია 416 608 ლარის სამშენებლო-სამონტაჟო სამუშაოები.
ნასყიდობის ხელშეკრულებით გათვალისწინებული ვალდებულების შეუსრულებლობის გამო ინვესტორს, 2014 წლის 23 ივლისის მდგომარეობით, 9310,25 ლარს და 12 151,6 აშშ დოლარის ჯარიმა ერიცხებოდა.
თუმცა კომპანიის მიერ წარმოდგენილი დოკუმენტაციით, 2011-2014 წლებში "V&T Agro"-ს მიერ სასათბურე მეურნეობის განვითარებაში ჩადებული ინვესტიციების საერთო მოცულობა 3 000 000 ლარზე მეტს შეადგენს და კომპანია ინვესტირებას კვლავ აგრძელებს. ასევე, კომპანიის მიერ დღეის მდგომარეობით მთლიანად შესრულებულია მიწის ნაკვეთზე ყველა აუცილებელი სამუშაოები, სათბურის მეტალო-კონსტრუქციის ასაგებად, რომელიც 2014 წლის იანვარში იმპორტირებული იქნება ისრაელიდან საერთო ღირებულებით 117 608 აშშ დოლარი დღგ-ს ჩათვლით.
ასევე, კომპანიის მიერ ხელი მოეწერა შეთანხმებას ,,Yildiz Termomekanik"-თან (თურქეთი) ნახშირით გათბობის სისტემის შემოტანაზე, საერთო ღირებულებით 60 000 აშშ დოლარი. გარდა ამისა, აგებულია სერვის ცენტრი სათბურის მომსახურებისათვის, ნაწილობრივ დაყენებულია მოწყობილობა. ამჟამად, მესამე რიგის სათბურის მშენებლობა 70%-ით დასრულებულია, რაზეც დაიხარჯა 416 608 ლარის ინვესტიცია. კომპანიის დამფუძნებლები ასევე აღნიშნავს, რომ უკრაინაში განვითარებულმა მოვლენებმა საგრძნობლად იმოქმედა უკრაინის ეკონომიკაზე, რომელიც აისახა შპს "V&T Agro"-ს ინვესტორების, უკრაინის მოქალაქეების ფინანსურ მდგომარეობაზე. მიუხედავად ამისა, დამფუძნებლები პოულობენ საკუთარ თავში ძალებს საინვესტიციო ვალდებულებების შესასრულებლად და მოგვმართავენ თხოვნით ნასყიდობის ხელშეკრულებით გათვალისწინებული ვალდებულებების შესასრულებლად დამატებითი ვადის 2015 წლის თებერვლამდე განსაზღვრას და დარიცხული ჯარიმებისაგან გათავისუფლებას.
აღნიშნულიდან გამომდინარე აჭარის მთავრობამ ფინანსთა და ეკონომიკის სამინისტროს და ,,V&P"-ს ხელშეკრულებით განსაზღვრულ საპრივატიზებო პირობების შეცვლაზე, თანხმობა გასცა. მთავრობა ასევე მზადაა ,,V&T Agro"-ს ფინანსთა და ეკონომიკის სამინისტროსა და შპს ,,V&P"-ს შორის 2011 წლის 06 იანვარს გაფორმებული ნასყიდობის ხელშეკრულებით გათვალისწინებული ვალდებულებების შეუსრულებლობისათვის დარიცხული ჯარიმისაგან, გაანთავისუფლოს.
შესაბამისად, შპს ,,V&T Agro"-ს ვალდებულებების შესრულების დრო 2015 წლის 1 თებერვლამდე გადაუვადდა.