ევროპის რეკონსტრუქციისა და განვითარების ბანკმა (ევრობანკი) თავისი დიდი ხნის კლიენტ „ვისოლ პეტროლიუმ ჯორჯიას" („ვისოლი") 65 მილიონი აშშ დოლარის მოცულობის სინდიცირებული სესხი გამოუყო. სესხი საქართველოს იმ გაზგასამართი სადგურების გაფართოებას დაუჭერს მხარს, რომლებიც კლიენტს ტრადიციული საწვავის ეკოლოგიურად უსაფრთხო ალტერნატივას - კომპრესირებულ ბუნებრივ აირს შესთავაზებენ.
სესხის სტრუქტურა გულისხმობს ორ კომპონენტს: A კატეგორიის კრედიტი 40 მილიონი აშშ დოლარის ოდენობით ევრობანკის მიერ გამოიყოფა, ხოლო B კატეგორიის კრედიტს ჰოლანდიის განვითარების ბანკი გამოჰყოფს 25 მილიონი აშშ დოლარის ოდენობით. საქართველოს კორპორატიულ სექტორში ეს არის სინდიცირებული სესხის გამოყოფის პირველი შემთხვევა, რომელშიც ადგილობრივი კერძო პარტნიორი და საერთაშორისო ბანკი მონაწილეობენ.
სინდიცირებული სესხი მოხმარდება „ვისოლის" ამბიციურ საინვესტიციო პროგრამას, რომელიც მიზნად ისახავს თანამედროვე დანადგარებით აღჭურვილი კომპრესირებული ბუნებრივი აირის 38-მდე ახალი გაზგასამართი სადგურის გახსნას. პროგრამა ასევე გააუმჯობესებს კომპანიის არსებული სადგურების ინფრასტრუქტურას, უზრუნველყოფს რა სხვა საწვავთან ერთად კომპრესირებული ბუნებრივი აირის შეთავაზებასა და თანამედროვე ენერგო-ეფექტური ტექნოლოგიების გამოყენებას. პროექტი ხელს შეუწყობს „ვისოლის" სადგურებს შეესაბამებოდნენ მაღალ გარემოსდაცვით სტანდარტებს. ევროკავშირის სამეზობლო საინვესტიციო მექანიზმის დაფინანსებით „ვისოლს" ჩატარებული აქვს ენერგო აუდიტი, რომელიც „კორპორატიული სექტორისთვის ენერგიის დამზოგავი პროგრამის" ფარგლებში განხორციელდა.
„ვისოლის" ჯგუფის წევრი „ვისოლ პეტროლიუმ ჯორჯია" საქართველოში ერთ-ერთი უმსხვილესი ბიზნეს ჯგუფია, რომელიც ლიდერად გვევლინება ნავთობპროდუქტების დამოუკიდებელ კერძო იმპორტიორთა და დისტრიბუტორთა შორის. მას ქვეყნის სარეალიზაციო ბაზრის მნიშვნელოვანი წილი უჭირავს.
ევრობანკის კავკასიის, მოლდოვისა და ბელორუსიის რეგიონალურმა დირექტორმა ბრუნო ბალვანერამ თბილისში პროექტზე შეთანხმების ხელმოწერისას განაცხადა: „გვახარებს ამ ახალი პროექტისა და ჩვენი დიდი ხნის პარტნიორის „ვისოლის" მხარდაჭერის შესაძლებლობა საწვავის თანამედროვე საცალო ბაზრის განვითარების პროცესში. ეს პროექტი უზრუნველყოფს, რომ ქართველმა მომხმარებელმა ბენზინის უფრო ეკონომიური და ეკოლოგიურად უსაფრთხო ალტერნატივის გამოყენება შეძლოს.
ჰოლანდიის განვითარების ბანკის მთავარმა საინვესტიციო ოფიცერმა ლინდა ბროკჰუზენმა დასძინა: „გვეამაყება ჩვენს პარტნიორებთან მუშაობა საქართველოში გარემოსდაცვითი სტანდარტების გასაუმჯობესებლად. ეს საინვესტიციო პროგრამა „ვისოლს" საშუალებას მისცემს შემდგომი ნაბიჯები გადადგას ენერგო-ეფექტურობის კუთხით წინსვლის გზაზე".
„ვისოლ" ჯგუფის პრეზიდენტმა სამსონ ფხაკაძემ აღნიშნა, რომ „ეს მნიშვნელოვანი მოვლენაა არა მხოლოდ „ვისოლის" ჯგუფისთვის, არამედ მთელი ქვეყნის ეკონომიკისთვის. გვეამაყება, რომ ვართ კორპორატიულ სექტორში პირველი ქართული კომპანია, რომელმაც სინდიცირებული სესხი მიიღო. ეს პროექტი საშუალებას მოგვცემს შევქმნათ მეტი სამუშაო ადგილი, შევთავაზოთ მომხმარებელს უფრო სუფთა და უსაფრთხო საწვავი და გავაუმჯობესოთ ენერგო ეფექტურობა ჩვენს ყოველდღიურ საქმიანობაში. მადლობას ვუხდით ევროპის რეკონსტრუქციისა და განვითარების ბანკსა და ჰოლანდიის განვითარების ბანკს „ვისოლის" უმაღლესი ხარისხისკენ სწრაფვის განსაკუთრებული მხარდაჭერისთვის."
ეს საინვესტიციო პროგრამა შეესაბამება ევრობანკის სტრატეგიას დააფინანსოს საწვავის მაღალხარისხიანი, დამოუკიდებელი საცალო-სარეალიზაციო ობიექტების განვითარება და გაფართოება სექტორში კონკურენციას გაზრდის პარალელურად. პროგრამა ასევე ასახავს ევრობანკის მიზანს კერძო სექტორის სტიმულირებისა და საუკეთესო გარემოსდაცვითი პრაქტიკის დანერგვის ნაწილში.
ევრობანკი საქართველოში ქვეყნის დამოუკიდებლობის მოპოვების დღიდან საქმიანობს. დღეის მდგომარეობით ინვესტიციები უკვე ჩადებულია 169 პროექტში და ქვეყნის ეკონომიკის სხვადასხვა სექტორში ჯამური კაპიტალდაბანდების ოდენობა 2 მილიარდ აშშ დოლარს შეადგენს. საქართველოში ევრობანკის ერთ-ერთი პრიორიტეტია კერძო სექტორის მდგრადი განვითარების ხელშეწყობა.