გერმანიის თავდაცვის მინისტრ ბორის პისტორიუსის განცხადებით, თურქეთში გამართული მოლაპარაკებები აჩვენებს, რომ რუსეთის პრეზიდენტი ვლადიმირ პუტინი უკრაინაში ომის დასრულებით დაინტერესებული არ არის
პისტორიუსმა თავის იტალიელ, ფრანგ, ბრიტანელ და პოლონელ კოლეგებთან შეხვედრის შემდეგ აღნიშნა, რომ პუტინი თავდაპირველად აცხადებს ცეცხლის შეწყვეტის შესახებ მოლაპარაკებების დაწყების განზრახვის შესახებ, თუმცა შემდეგ არ მიდის შეხვედრაზე და მის ნაცვლად მესამეხარისხოვან დელეგაციას აგზავნის.
პისტორიუსმა აღნიშნა, რომ პუტინი უარს ამბობს უკრაინის პრეზიდენტ ვოლოდიმირ ზელენსკისთან მოლაპარაკებაზე. მისი თქმით, ამით პუტინი ნათლად აჩვენებს, რომ ამჟამად აბსოლუტურად არ არის დაინტერესებული ამ აგრესიული ომის დასრულებით.
პისტორიუსის თქმით, „არ არსებობს არანაირი მინიშნება მშვიდობიანი გადაწყვეტის მიღწევის სერიოზული სურვილის შესახებ“.
ამ ფონზე, გერმანიის თავდაცვის მინისტრმა კიდევ ერთხელ ხაზი გაუსვა: „ევროპა და მისი მოკავშირეები კვლავაც აგრძელებენ უკრაინისთვის საიმედო და თანმიმდევრული მხარდაჭერის გაწევას.“
