ე.წ. "მოდულის" შენობასთან პოლიტპატიმრების მხარდასაჭერად საპროტესტო აქცია გაიმართა, რომელსაც "ეროვნულ საბჭოში" შემავალი პარტიების ლიდერებიც დაესწრნენ. 
როგორც ჟურნალისტებს "მოძრაობა სამართლიანი საქართველოს" ლიდერმა ზურაბ ნოღაიდელმა განუცხადა, ისინი უკანონო პატიმრების გათავისუფლების მოთხოვნით საპროტესტო აქციების სერიას აგრძელებენ, რომელსაც ყოველკვირეულად მართავენ.
ნოღაიდელის მტკიცებით, საქართველოში რეგისტრირებულია 50-მდე უკანონო პატიმარი, თუმცა მათი რაოდენობა გაცილებით მეტია.
"ჩვენ აქ შევიკრიბეთ, რათა უკანონო პატიმრებს სოლიდარობა გამოვუცხადოთ, მათ შორის ცოტნე გამსახურდიას და ეკა ბესელიას ოჯახის წევრებს. "მოდულის" შენობა არის "სააკაშვილის კრაზანების ბუდე", სადაც უკანონობა იგეგმება. ხელისუფლების შეცვლის შემდეგ ყველა უკანონო პატიმრის საქმესთან დაკავშირებით დამნაშავეები პასუხისგებაში მიეცემიან",- განაცხადა აქციაზე კონსერვატორების ლიდერმა ზვიად ძიძიგურმა.
შეგახსენებთ,რომ ოპოზიციური პარტიები პოლიტპატიმრების განთავისუფლების მოთხოვნით საპროტესტო აქციებს დედაქალაქის სხვადასხვა უბანში ყოველ ხუთშაბათს მართავენ.