დედაქალაქის ბიუჯეტთან დაკავშირებით თბილისის მერიიის განცხადებას იურიდიული კომისიის თავმჯდომარე გამოეხმაურა.
დავით ჯინჭარაძის განცხადებით, საკრებულოს უმრავლესობას სურვილია, დედაქალაქის ბიუჯეტის მიღებულ იქნას, თუმცა ეს უნდა იყოს ბიუჯეტი, რომლის ხარჯვითი ნაწილიც კითხვის ნიშნებს არ იწვევს.
აქედან გამომდინარე, მერიას მიეწოდება ის შენიშვნები, რომელთა ჩამოყალიბებაც უკვე მოხდა საკრებულოს კომისიებისა და ფრაქციების სხდომებზე
"ჩვენი სურვილია ბიუჯეტს მხარი დავუჭიროთ, თუმცა ეს იქნება ის ბიუჯეტი რომლის ხარჯვით ნაწილთანაც არ გვექნება პრეტენზიები. ბიუჯეტის პროექტის განხილვა, პროცედურულად, რეგლამენტის სრული დაცვით დაეწერა ყველა ფრაქციასა და კომისიას. შესაბამისად, ჩატარდა ყველა კომისიის სხდომა და არსებობს შენიშვნები.
ჩვენ არსებული შენიშვნების ერთობლივ დოკუმენტს ვამზადებთ, რომელიც დღის განმავლობაში მერიას გადაეგზავნება. ხვალ კი საკრებულოს საფინანსო კომისიის რეგლამენტით გაწერილი დასკვნითი სხდომა ჩატარდება, რის შემდეგაც დოკუმენტი სხდომაზე გასატანად იქნება მზად", - განაცხადა დავით ჯინჭარაძემ.
მერიის მიერ გავრცელებულ განცხადებაში ნათქვამია, რომ 2014 წლის ბიუჯეტის პროექტის შესახებ "ქართული ოცნების" უმრავლესობისგან წერილობით მომზადებული წინანდადებები ამ დრომდე არ მიუღიათ, თუმცა ისინი 24 საათიანი რეჟიმით მუშაობისთვის მზადყოფნას გამოთქვამენ, რათა უმრავლესობასთან ერთად შეძლონ ბიუჯეტის დამტკიცება.