„საქართველოს ახალგაზრდა კონსტიტუციონალისტთა ასოციაცია" განხორციელებული პროექტების საფუძველზე ეხმიანება იმ გამოწვევებს, რომლებიც უმაღლესი განათლების ეროვნულ სიტემაში შეინიშნება და აქედან გამომდინარე ახლადდაკომპლექტებული საკონსტიტუციო კომისიის საქმიანობის ერთ-ერთ მთავარ ასპექტად აკადემიური თავისუფლების პრინციპის კონსტიტუციურ რეგლამენტაციას განიხილავს.
„ უმაღლესი განათლების სისტემაში დღეს-დღეობით შექმნილი არასახარბიელო ვითარება მეტწილად იმ სახელმწიფო პოლიტიკის შედეგია, რომელიც გასული 9 წლის განმავლობაში აკადემიურ სივრცეში პროფესორ-მასწავლებელთა რეპრესიებზე, პოლიტიკური ნიშნით დევნაზე, უნივერსიტეტების ავტონომიურობის ხელყოფაზე იყო დაფუძნებული. აღნიშნულს თან ერთვოდა არაეფექტური, პერმანენტული რეფორმები, რის შედეგადაც საუნივერსიტეტო განათლების დონე საქართველოში კვლავინდებურად ვერ უთანაბრდება განვითარებულ, დემოკრატიულ სახელმწიფოებში დამკვიდრებულ სტანდარტებს.
ორგანიზაცია კარგად აცნობიერებს, რომ უმაღლესი განათლების სისტემის წარმატებით რეფორმირება ხანგრძლივი, კომპლექსური და შრომატევადი პროცესია. თუმცა, ეს არ უნდა იქცეს რეფორმის დაწყების შეფერხების საფუძვლად. აუცილებელია, რომ გადაიდგას პირველი ნაბიჯები, რომლებიც პრინციულ დონეზე გამოკვეთს სისტემური ცვლილებების კონტურებს. ამ ჭრილში, რა თქმა უნდა, ერთ-ერთ უმთავრეს მიმართულებას აკადემიური თავისუფლების პრინციპის რეალიზაციისთვის შესაბამისი საკანონმდებლო ნიადაგის ჩამოყალიბება წარმოადგენს.
ასოციაციის პოზიციით სწორედ აკადემიური თავისუფლების პრინციპის ქვეყნის ძირითად კანონში ასახვა გახდება სამომავლოდ აკადემიური სივრცისგან განცალკევებული, ნებისმიერი გარე ძალის, მათ შორის, ხელისუფლების კვლევის, სწავლებისა და სწავლის პროცესში ჩაურევლობის გარანტი. ხსენებულ კონტექსტში მნიშვნელოვანია იმ სახელმწიფოთა კონსტიტუციური პრაქტიკის გაანალიზება, რომლებშიც აკადემიური თავისუფლების პრინციპის კონსტიტუციური რეგლამენტაცია იქცა წარმატებული უმაღლესი განათლების სისტემის შექმნის წინაპირობად. ერთ-ერთ ასეთ ქვეყანას გერმანია წარმოადგენს. ამასთან, მნიშვნელოვანია საქართველოს დემოკრატიული რესპუბლიკის 1921 წლის კონსტიტუციის მეთორმეტე თავის 109-ე მუხლი, რომელიც აგრეთვე ახდენდა ქვეყნის ძირითად კანონში მეცნიერებისა და სწავლების თავისუფლების დეკლარირებას"- ნათქვამია „საქართველოს ახალგაზრდა კონსტიტუციონალისტთა ასოციაციაში".
„საქართველოს ახალგაზრდა კონსტიტუციონალისტთა ასოციაცია" მიმართავს სახელმწიფო საკონსტიტუციო კომისიას, რომ საქმიანობის ერთ-ერთ მიმართულებად კონსტიტუციის II თავში აკადემიური თავისუფლების პრინციპის რეგლამენტაცია დაისახოს, რითიც უმაღლესი განათლების სისტემის ოპტიმიზაციის სერიოზული საფუძველი შეიქმნება. ორგანიზაცია აღნიშნულთან დაკავშირებით კომისიას შესაბამის კონსტიტუციურ კანონის პროექტსაც წარუდგენს.