„მჯერა, რომ თბილისის სახელმწიფო უნივერსიტეტი შეინარჩუნებს და ყოველთვის შეასრულებს მთავარი საგანმანათლებლო ცენტრის ფუნქციას", აცხადებს საქართველოს პრემიერ-მინისტრი. როგორც ირაკლი ღარიბაშვილის განცხადებაშია აღნიშნული, 8 თებერვალი ქვეყნისთვის ერთ-ერთი უმნიშვნელოვანესი დღეა. 96 წლის წინ, დავით აღმაშენებლის ხსენების დღეს, დიდმა ქართველმა მეცნიერებმა დააარსეს ევროპული ტიპის უმაღლესი სკოლა - თბილისის ივანე ჯავახიშვილის სახელობის სახელმწიფო უნივერსიტეტი.
„ჯერ კიდევ მე-20 საუკუნის დასაწყისში საქართველოში შეიქმნა ისეთი საგანმანათლებლო ცენტრი, სადაც შესაძლებელი გახდა ეროვნული და ევროპული ღირებულებების შერწყმა, ზოგადსაკაცობრიო იდეალების მსახურება. სწორედ ამიტომ იქცა უნივერსიტეტი განათლების, ქართული მეცნიერებისა და კულტურის უმნიშვნელოვანეს კერად.
ვულოცავ უნივერსიტეტის პროფესორ-მასწავლებლებს, სტუდენტებს, ყველა მის კურსდამთავრებულს უნივერსიტეტის დაარსების დღეს. მჯერა, რომ თბილისის სახელმწიფო უნივერსიტეტი შეინარჩუნებს და ყოველთვის შეასრულებს მთავარი საგანმანათლებლო ცენტრის ფუნქციას"- ნათქვამია ირაკლი ღარიბაშვილის განცხადებაში.
