ჯანდაცვის კომიტეტმა ,,პატიმრობის კოდექსსში" შესატან ცვლილებებს მხარი დაუჭირა. ცვლილების თანახმად, თავისუფლების აღკვეთის დაწესებულებათა კატეგორიები განისაზღვრება. დაწესებულებებში მსჯავრდებულთა განთავსება რისკების მიხედვით მოხდება, ხოლო რისკების სახეები და კრიტერიუმები მინისტრის ბრძანებით დადგინდება.
კანონპროექტი, რომლის ინიციატორიც საქართველოს მთავრობაა, ჯანმრთელობის დაცვისა და სოციალურ საკითხთა კომიტეტს პირველი მოსმენით განსახილველად სასჯელაღსრულებისა და პრობაციის მინისტრის მოადგილემ, გრიგოლ გიორგაძემ წარუდგინა.
მისი ინფორმაციით, მე-10 მუხლის მე-2 ნაწილი შემდეგი რედაქციით ჩამოყალიბდება: „თავისუფლების აღკვეთის კატეგორიებია: ა) დაბალი რისკის თავისუფლების აღკვეთის დაწესებულება; ბ) ნახევრად ღია ტიპის თავისუფლების აღკვეთის დაწესებულება; გ) დახურული ტიპის თავისუფლების აღკვეთის დაწესებულება; დ) განსაკუთრებული რისკის თავისუფლების აღკვეთის დაწესებულება; 2) არასრულწლოვანთა სარეაბილიტაციო დაწესებულება; 3) ქალთა სპეციალური დაწესებულება".
ასევე, კოდექსს ემატება მუხლები, რომლებშიც განმარტებულია თავისუფლების აღკვეთის დაწესებულებათა ტიპი და მოქმედი წესები. გიორგაძის თქმით, იზრდება ხანგრძლივი, ხანმოკლე და ვიდეო პაემნების რაოდენობა. გაფართოვდება იმ პირთა წრე, ვისაც მსჯავრდებულთან ხანგრძლივ ან ხანმოკლე პაემანზე შეხვედრის უფლება ექნება. ოჯახის წევრების გარდა, პატიმრებთან შეხვედრის საშუალება მიეცემა პირს, რომელთანაც მსჯავრდებულს საერთო შვილი ჰყავს, დედინაცვალს, მამინაცვალს, გერს და ასევე, განსაკუთრებული საჭიროების შემთხვევაში, ოჯახთან დაახლოებულ სხვა პირებსაც.
ასევე, გაიზრდება მსჯავრდებულთა საცხოვრებელი ფართიც. გარდა ამისა, მსჯავრდებულს მიეცემა უფლება, განსაკუთრებული გარემოებების არსებობის შემთხვევაში, დროებით დატოვოს თავისუფლების აღკვეთის დაწესებულება, კანონპროექტში, პატიმართა რესოციალიზაციისა და რეაბილიტაციის მიზნით, სხვა სიახლეებიცაა გათვალისწინებული, მათ შორის, ანაზღაურება მსჯავრდებულის მიერ გაწეული სამეურნეო სამუშაოებისთვის.
„ჯანმრთელობის დაცვისა და სოციალურ საკითხთა კომიტეტი მიესალმება პატიმრობის კოდექსში ცვლილებების შეტანას. ჩვენ გვაქვს ვალდებულება, დავუახლოვდეთ ევროპულ სტანდარტებს, ხოლო მსჯავრდებულთა უფლებების დაცვა და მათთვის პირობების გაუმჯობესება, ამ კუთხით, ერთ-ერთი პრიორიტეტული საკითხია", - განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ.
კომიტეტის წევრებმა წარმოდგენილ ცვლილებებს მხარი ერთხმად დაუჭირეს.