საჯარო რეესტრის ეროვნულმა სააგენტომ, საკონსულტაციო კომპანია „სინერჯი ჯგუფთან" ერთად, ახალი ორგანიზაციული სტრუქტურის ფორმირება დაასრულა.
სტრუქტურის ახალი მოდელი, სააგენტოს წინაშე მდგარ პრიორიტეტულ ამოცანებს სრულად პასუხობს, მასში მთავარი აქცენტები ორგანიზაციის განვითარებაზე, რეგისტრაციის და ინფორმაციის ხარისხის სრულყოფასა და მომხმარებელთა მომსახურებაზე გაკეთდა. შედეგად კი ჩამოყალიბდა სააგენტოს საჭიროებებს მორგებული, მოქნილი სტრუქტურა, რომელშიც მუშაობის გუნდური პრინციპი და გადაწყვეტილებების კოლეგიურად მიღება უმნიშვნელოვანესია.
პროექტის ფარგლებში, სააგენტოს ხელმძღვანელობამ (თავმჯდომარე, მოადგილე, სტრუქტურული ქვედანაყოფების ხელმძღვანელები), საკონსულტაციო კომპანია „სინერჯი ჯგუფის" დახმარებით, არსებული სტრუქტურა დეტალურად შეისწავლა, შეაფასა რესურსები, განსაზღვრა პრიორიტეტები და, სააგენტოს წინაშე მდგარი განვითარების შესაძლებლობებიდან და სტრატეგიული მიზნებიდან გამომდინარე, სტრუქტურული მოწყობის ახალი მოდელი შეიმუშავა. განხილვის პროცესში თანამშრომლების მოსაზრებები და წინადადებები მაქსიმალურად იქნა გათვალისწინებული.
კონცეფციაზე მუშაობის პროექტი 2013 წლის დეკემბერში დაიწყო და 6 კვირის განმავლობაში მიმდინარეობდა.
საჯარო რეესტრის ეროვნულმა სააგენტომ ახალი სტრუქტურით მუშაობა 3 თებერვლიდან დაიწყო.
სააგენტოში იმედოვნებენ, რომ ახალი სტრუქტურა მათ დასახული მიზნების მიღწევისა და რეალიზაციის საშუალებას მისცემს.