კახეთის საინფორმაციო ცენტრის ინფორმაციით, თელავის რაიონის სოფელ ნაფარეულში, ფსიქოტროპული მედიკამენტების მიღების შედეგად 3 წლის ბავშვი გარდაიცვალა. როგორც კახეთის საინფორმაციო ცენტრს გარდაცვლილის პაპამ ალექსანდრე ჭეკურიშვილმა განუცხადა, გოგონა ოთახში მარტო იმყოფებოდა და მამამისის წამლები დალია.
ბავშვი პაპამ თელავის რეფერალურ საავადმყოფოში გადაიყვანა. ალექსანდრე ჭეკურიშვილი არ გამორიცხავს, რომ გოგონას მდგომარეობა ექიმების მიერ დაშვებული შეცდომის გამო გაუარესებულიყო.
„3 იანვარს, ეზოში ვიყავით გამოსულები. სულ რამდენიმე წუთით დავტოვეთ ოთახში ბავშვი. სკამზე მამამისის ფსიქოტროპული წამლები ელაგა და ორი აბი დაულევია. თვითონვე გვითხრა ამის შესახებ. მაშინვე დავრეკე ნაფარეულის სასწრაფო - სამედიცინო სამსახურში, მაგრამ არ მუშაობდნენ, ამიტომ ბავშვი თელავის რეფერალურ საავადმყოფოში წავიყვანე. გოგონა გზაში ძალიან კარგ ხასიათზე იყო. საავადმყოფოში რომ მივედით ცოტა ხანში პირღებინება დაეწყო. ბავშვთა ექიმი იქ არ იყო და მის ჩამოსაყვანად წავედი. საავადმყოფოში რომ დავბრუნდი, გათიშული დამხვდა. ვვარაუდობთ, რომ შესაძლოა, ჩემი წასვლის შემდეგ ბავშვი არ დაემორჩილათ და ან ხელიდან გაუვარდათ, ან ზედმეტი დოზით გაუკეთეს წამალი. 20 დღე თბილისში აპარატზე გვყავდა შეერთებული, მაგრამ ვერაფერი ვუშველეთ", - განუცხადა კახეთის საინფორმაციო ცენტრს ალექსანდრე ჭეკურიშვილმა.
თელავის რეფერალური საავადმყოფოს დირექტორი გელა ორველაშვილი აცხადებს, რომ გოგონას შესაბამისი სამედიცინო დახმარება ჩაუტარდა. მისი თქმით, ბავშვი საავადმყოფოში მძიმე მდგომარეობაში მიიყვანეს, რის გამოც რეანიმაციულ განყოფილებაში მოთავსდა, რამდენიმე საათში კი კატასტროფის მედიცინის ცენტრის ბრიგადამ თბილისში გადაიყვანა.
გოგონას პაპის ინფორმაციით, გარდაცვალების მიზეზის დასადგენად ცხედარს ექსპერტიზა ჩაუტარდა და პასუხები რამდენიმე დღეში გახდება ცნობილი.
მასალის გამოყენების პირობები
