1-ელ თებერვალს საქართველოს ხუთ რეგიონში ხაშურში, თელავში, გორში, თბილისში, ქუთაისსა და ზუგდიდში სოჭის ოლიმპიადის საწინააღმდეგო აქცია გაიმართება. ამის შესახებ, ჟურნალისტებთან ,,ნაცმოძრაობის" წევრმა და მოძრაობა ,,დამოუკიდებლობისა და ევროინტეგრაციისთვის" დამფუძნებელმა ანდრო ბარნოვმა განაცხადა და საზოგადოებას აქციაში მონაწილეობისკენ მოუწოდა.
"მე ყველა იმ ქალაქში ჩავალ, სადაც აქცია დაიგეგმა. იმედი მაქვს, ცუდი ამინდი არ შეუშლის ხელს საზოგადოების იმ ნაწილს, ვისაც აქციაზე მოსვლა უნდა. იმედია, რომ ერთიანობას ოკუპაციის წინააღმდეგ ამინდი ხელს ვერ შეუშლის. ჩვენი მოძრაობაში გაერთიანების სურვილი ძალიან ბევრმა ადამიანმა გამოთქვა. მოძრაობას აქვს საგანმანათლებლო მიზანი, რათა საზოგადოებამ გაიგოს ვინ არის ოკუპანტი რუსეთი და რა საფრთხეების მომტანია ჩვენი ქვეყნისთვის. ჩვენი მიზანია, რომ მთელი საზოგადოება გავაერთიანოთ ამ მიზნის გარშემო. შევხედავთ, თუ რას მოიმოქმედებს პუტინი და ამის შემდეგ ვიმოქმედებთ, გადავწყვეტთ სამომავლოდ კვლავ გაიმართება თუ არა აქციები", - განაცხადა ბარნოვმა.
აქცია ანდრო ბარნოვის მიერ დაფუძნებული მოძრაობის "დამოუკიდებლობისა და ევროინტეგრაციისთვის" ორგანიზებით იმართება.