სახალხო დამცველი უჩა ნანუაშვილი გურამიშვილის გამზირზე მცხოვრებ დევნილთა საცხოვრებელ პირობებთან დაკავშირებით განაცხადებას ავრცელებს, როემლსაც ,,ჯი-ეიჩ-ენი" უცვლელად გთავაზობთ: ,,საქართველოს სახალხო დამცველს განცხადებით მიმართეს თბილისი, გურამიშვილის გამზ. N76-ში (ალკოჰოლურ სასმელთა ცენტრი) მცხოვრებმა იძულებით გადაადგილებულმა პირებმა, მძიმე საყოფაცხოვრებო პირობებთან დაკავშირებით. განმცხადებლები მიუთითებენ, რომ 2013 წლის 15 დეკემბერს თბილისში, ძლიერმა ქარმა მათ საცხოვრებელ შენობას სახურავი გადახადა.
საკითხის შესწავლის მიზნით, საქართველოს სახალხო დამცველის რწმუნებულები იმყოფებოდნენ თბილისი, გურამიშვილის გამზ. N76-ში (ალკოჰოლურ სასმელთა ცენტრი), სადაც გაესაუბრნენ დევნილებს. გასაუბრებისას გაირკვა, რომ ზემოაღნიშნულ უძრავ ქონებას გააჩნია კომპაქტურად განსახლების ობიექტის სტატუსი, თუმცა შენობას ჰყავს კერძო მესაკუთრე.
თბილისი, გურამიშვილის გამზ. N76-ში მცხოვრები იძულებით გადაადგილებული პირები დღეს დაუკავშირდნენ საქართველოს სახალხო დამცველის აპარატს და აცნობეს, რომ უამინდობის გამო, წვიმის შედეგად აღნიშნულ შენობაში ჩადის წყალი, რაც საფრთხეს უქმნის იქ მცხოვრებ რამდენიმე იძულებით გადაადგილებულ ოჯახს და ისინი დაუყოვნებლივ დახმარებას საჭიროებენ.
სახალხო დამცველის აპარატმა რეაგირებისათვის მიმართა როგორც საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს, ასევე ნაძალადევის გამგეობას. თუმცა, ორივე უწყება აცხადებს, რომ მათ ქმედითი ზომების მიღება არ შეუძლიათ, ვინაიდან, შენობის კერძო მესაკუთრე უარს აცხადებს მითითებულ უძრავ ქონებაში სარემონტო-სარეაბილიტაციო სამუშაოების განხორციელებაზე თანხმობის გაცემასთან დაკავშირებით.
სახალხო დამცველი აღნიშნავს, რომ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო ვალდებულია, ობიექტის კომპაქტურად განსახლების სტატუსიდან გამომდინარე, მოახდინოს რეაგირება და უმოკლეს ვადაში უზრუნველყოს გურამიშვილის N76-ში მცხოვრები დევნილები სათანადო საცხოვრებელი პირობებით", _ნათქვამია განცხადებაში.