„ყოფილი პოლიტპატიმრები ადამიანის უფლებებისთვის" ხელმძღვანელი ქურდული სამყაროს შესახებ კანონის შესახებ პრემიერ- მინისტრის განცხადებას ეხმაურება. ნანა კაკაბაძე „პირველ რადიოსთან" აცხადებს, რომ ირაკლი ღარიბაშვილი პირდაპირ ერევა საკანონმდებლო ორგანოს ფუნქციონირებაში და მას უნდა ახსოვდეს, რომ საქართველოს დირექტორი არ არის.
„პრობლემა გაცილებით სერიოზულია ვიდრე ერთი კონკრეტული მუხლი, რადგან აღმასრულებელი ხელისუფლება ბედავს ასე ღიად და დაუფარავად ჩაერიოს საკანონმდევბლო ორგანოს ფუნქციებში. ეს არ არის დამახასიათებელი დემოკრატიული სახელმწიფოსთვის, ეს არის ტოტალიტარული ქვეყნებისთვის ამახასიათებელი, რომ ყველაფერი უნდა იყოს ერთი ადამიანის ხელში. რა უფლება აქვს აღამასრულებელი ხელისუფლების მეთაურს ჩაერიოს საკანონმდებლო ორგანოს მუშაობაში?!",-განაცხადა ნანა კაკაბაძემ
ნანა კაკაბაძის განცხადებით, ანალოგიური შემთხვევა იყო ბიძინა ივანიშვილის „დროებითი პრემიერობის" დროს, როდესაც პირველი მოსმენით გასული იპოთეკარების კანონპროექტი ივანიშვილის განცხადების შემდეგ, რომ „ეს აღარ გაგრძელდება" დაიხურა ეს თემა და გაჩერდა. კაკაბაძის თქმით იგივე გრძელდება დღევანდელი პრემიერის მხრიდანაც.
„იგივე ხდება დღესაც. ირაკლი ღარიბაშვილი არის აღმასრულებელი ხელისუფლების მეთაური. ის არ არის საქართველოს დირექტორი. მხოლოდ აღმასრულებელი ხელისუფლების საქმიანობაში აქვს ჩარევის უფლება. ჩვენ სააკაშვილის დროს ვამბობდით , რომ პარლამენტი იყო ნოტარიული, დღეს უკვე საჯარო რეესტრიც კი აღარ არის. რასაც ხელისუფლება ეტყვის იმას არეგისტრირებს. გაოცებული ვარ, როცა ასე ღიად მიმდინარეობს ძალადობა პარლამენტზე, რას ჰგავს ეს, ეს არის დემოკრატია?! ",-განაცხადა ნანა კაკაბაძემ
კაკაბაძემ ასევე გაიხსენა ვახტანგ ხმალაძის განცხადება ქურდული სამყაროს წევრობის შესახებ კანონში არსებული ხარვეზების შესახებ. მისი თქმით, მან ერთ დღეს თქვა, რომ კანონი გადასახედია, თუმცა მასშემდეგ, რაც ცნობილი გახდა მთავრობის პოზიცია მან შეხედულებები შეიცვალა და თქვა, რომ „ხარვეზებს თურმე ვერ ხედავს"