თბილისის საკრებულოს უმცირესობის წევრები რეგიონული განვითარებისა და ინფრასტრუქტურის მინისტრის მიერ გაკეთებულ განცხადებას ეხმიანებიან და დავით ნარმანიას შეხვედრის კონკრეტული თარიღის დასახელებას სთხოვენ.როგორც საკრებულოს ფრაქცია "ნაციონალური მოძრაობა-რეფორმატორების" თავმჯდომარემ აღნიშნა, საკრებულოს უმცირესობისთვის გაუგებარია მინისტრ დავით ნარმანიას არგუმენტები, რომლის მიხედვითაც, სამტრედიის ქუჩისა და "ვეფხისა და მოყმის'' ძეგლთან დაგეგმილი შემაერთებელი ხიდის მშენებლობა შეჩერდა.
თემურ გრიგალაშვილის თქმით, მას შემდეგ რაც საკრებულოს უმცირესობამ აღნიშნული პრობლემის მოსაგვარებლად მინისტრს მუშა შეხვედრა შესთავაზა, დავით ნარმანიამ არგუმენტად დროის უქონლობა დაასახელა.
"მოგეხსენებათ, ხიდის მშენებლობა დავით ნარმანიას გადაწყვეტილებით იქნა შეჩერებული. როდესაც აღნიშნული პრობლემის მოსაგვარებლად მინისტრს მუშა შეხვედრა შევთავაზეთ, მისგან მივიღეთ უცნაური პასუხი. როგორც დავით ნარმანიამ განაცხადა, მას არ აქვს დრო და ამ არგუმენტით მან ფაქტიურად თავი აარიდა აღნიშნულ საკითხზე მსჯელობას.
ხიდი არ არის რომელიმე პოლიტიკური გუნდის, დეპუტატის ან მინისტრის საკუთრება და ის ეკუთვნის ხალხს. მიმაჩნია, რომ თითოეული ჩვენთაგანის მოვალეობაა თბილისელებისათვის პრობლემების მოგვარება, თუმცა სამწუხაროდ ჩვენ ამის მზაობა დავით ნარმანიას მხრიდან ვერ დავინახეთ",- განაცხადა თემურ გრიგალაშვილმა.
საკრებულოს უმცირესობამ რეგიონული განვითარებისა და ინფრასტრუქტურის მინისტრს წერილობით მიმართეს და შეხვედრის კონკრეტული თარიღის დასახალება მოითხოვეს.
აღნიშნული საკითხის კომენტირებისას ბატონმა დავით ნარმანიამ აღნიშნა, რომ საკრებულოს დეპუტატები თავად მივსულიყავით ინფრასტრუქტურის სამინისტროში. ჩვენთვის ნამდვილად არ აქვს მნიშვნელობა სად შედგება შეხვედრა, ამიტომ ვიღებთ ამ შემოთავაზებას.
საკრებულოს უმცირესობამ რეგიონული განვითარებისა და ინფრასტრუქტურის მინისტრს მივმართეთ წერილით, აკონკრეტდეს თარიღი და დრო, თუ როდის შედგება შეხვედრა.
ჩვენ მზად ვართ სამინისტროს დეტალურად წარვუდგინოთ ის არგუმენტები, თუ რა შედეგს მოუტანს მოსახლეობას ამ ხიდის მშენებლობა.
მიგვაჩნია, რომ დავით ნარამანიას პასუხი უსუსური და დაუსაბუთებელია, ამიტომ ჩვენ არ დავიღლებით და მზად ვართ ბოლომდე მივყვეთ ამ საქმეს, რადგან ჩვენი ვალია მოსახლეობის გვერდში დგომა და მათი პრობლემების მოგვარება",- განაცხადა ფრაქცია "ნაციონალური მოძრაობა - განახლებული თბილისის" თავმჯდომარემ თამაზ შოშიაშვილმა.
