საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ შეხვედრა გამართა ჟენევაში ევროკავშირის დელეგაციის ხელმძღვანელის მოადგილესთან დომინიკ პორტერთან.
შეხვედრაზე მხარეებმა განიხილეს ევროკავშირსა და საქართველოს შორის გაფორმებული ხელშეკრულების ფარგლებში მიმდინარე " დევნილები III" და "დევნილები IV" პროექტები, ასევე, დევნილთა შემოსავლის წყაროებისა და სამინისტროსთვის ტექნიკური დახმარების პროექტების პერსპექტივები. ისაუბრეს მომავალი თანამშრომლობის საკითხებზე.
დომინიკ პორტერმა შეხვედრაზე ხაზი გაუსვა საქართველოს მიერ დემოკრატიის განვითარების გზაზე გადადგმულ ნაბიჯებს. მან მაღალი შეფასება მისცა ევროკავშირსა და საქართველოს შორის ასოცირების ხელშეკრულების პარაფირებას და აღნიშნა, რომ ეს ფაქტი არის საქართველოსა და ევროკავშირს შორის თანამშრომლობის გაღრმავება.
შეხვედრას ესწრებოდნენ მინისტრის მოადგილე ნინო ჭავჭავაძე, ჟენევაში გაეროს განყოფილებებთან და სხვა საერთაშორისო ორგანიზაციებთან საქართველოს მუდმივი წარმომადგენელი შალვა ცისკარაშვილი და საერთაშორისო ურთიერთობის დეპარტამენტის უფროსი თამარ ბასილია.
