კვიპროსის ქართველთა სათვისტომო აქტიურ საქმიანობას იწყებს. სათვისტომომ "ძალა ერთობაშია, უკვე გამართა მმართველი საბჭოს არჩევნები. ამის შესახებ "ჯი-ეიჩ-ენს" კვიპროსში საქართველოს საელჩოდან აცნობეს.
მმართველი საბჭოს შემადგენლობაში წესდების შესაბამისად, შვიდი წევრი აირჩიეს. თავად საბჭომ კი თავის პირველ სხდომაზე სათვისტომოს თავმჯდომარე აირჩია და წევრებს შორის ფუნქციები დარგობრივი და ტერიტორიული პრინციპით გადაანაწილა.
კვიპროსში ქართველთა სათვისტომოს თავმჯდომარედ აირჩიეს საქართველოს საპატიო კონსული. ქ. ლარნაკაში _ დავით ბახტაძე.
საბჭოს შემადგენლობა და წევრთა ფუნქციები შემდეგი სახით განისაზღვრა: დავით ბახტაძე - საქართველოს საპატიო კონსული ქ. ლარნაკაში; სათვისტომოს თავმჯდომარე - ასევე, ქ. ლარნაკას მიმართულების კურატორი. მევლუდ ყაფლანიშვილი - ბიზნესმენი. სათვისტომოს ყოფილი ხელმძღვანელი - თავმჯდომარის მოადგილე, ქ. ნიქოზიის მიმართულების კურატორი. მაია კარიბიდი - პონტიელ ბერძენთა ორგანიზაციის წარმომადგენელი - ქ. პაფოსის მიმართულების კურატორი. ივანე მდივნიშვილი - უძრავი ქონების მენეჯერი - ქ. ლიმასოლის მიმართულების კურატორი. მამა დავითი (მაღლაფერიძე) - საქართველოს საპატრიარქოს წარმოგზავნილი - კურირებას გაუწევს საკვირაო სკოლებს. გიორგი კაპანაძე - სტუდენტი, კვიპროსული აუდიტ-კომპანიის PWC თანამშრომელი - სათვისტომოს ფინანსები და ბუღალტერია. ნინო ნიკოგოსოვა - პედაგოგი, ეკონომისტი - სათვისტომოს საორგანიზაციო და სამდივნო საქმიანობა.
როგორც კვიპროსში საქართველოს საგანგებო და სრულუფლებიანი ელჩი ვლადიმერ კონსტანტინიდი განმარტავს, ახლო მომავალში დაგეგმილია შეხვედრები კვიპროსის შინაგან საქმეთა სამინისტროს, პოლიციის, მუნიციპალიტეტებისა და საემიგრაციო სამსახურების ხელმძღვანელებთან, მათთვის სათვისტომოს საქმიანობისა და სამომავლო გეგმების გაცნობის მიზნით.
