აშშ-ის პრეზიდენტის წარმომადგენელი სტივ უიტკოფი ამ შაბათ-კვირას ბერლინში ევროპელ ლიდერებსა და უკრაინის პრეზიდენტ ვოლოდიმირ ზელენსკის შეხვდება.
ამის შესახებ ინფორმაციას The Wall Street Journal წყაროზე დაყრდნობით ავრცელებს.
„ეს შეხვედრა გადამწყვეტია, რადგან თეთრი სახლი ცდილობს წლის ბოლომდე რუსეთთან ომის დასრულების შესახებ შეთანხმების მიღწევას,“ - წერს გამოცემა.
The Wall Street Journal-ის ცნობით, უიტკოფთან ბერლინში მოლაპარაკებებში მონაწილეობას საფრანგეთის პრეზიდენტი ემანუელ მაკრონი, დიდი ბრიტანეთის პრემიერ-მინისტრი კირ სტარმერი და გერმანიის კანცლერი ფრიდრიხ მერცი მიიღებენ.
მანამდე, გერმანიის მთავრობის წარმომადგენლებმა განაცხადეს, რომ უკრაინის პრეზიდენტი ვოლოდიმირ ზელენსკი გერმანიის დედაქალაქში ორშაბათს, 15 დეკემბერს ჩავა.
მედიის ცნობით, მოწვევა მოჰყვა ოთხშაბათს ფრიდროხ მერცს, ემანუელ მაკრონს, კირ სტარმერსა და დონალდ ტრამპს შორის დაძაბულ სატელეფონო საუბარს, რომლის დროსაც მხარეები ცდილობდნენ მშვიდობიანი ძალისხმევის მიმართულებასთან დაკავშირებით უთანხმოების დაძლევას.
