სტრასბურგის ადამიანის უფლებათა ევროპის სასამართლოში (ECHR) რუსეთის წინააღმდეგ საქართველოს 134 მოქალაქის სარჩელი შევიდა.
სარჩელებში, რომლებიც საქართველოს ახალგაზრდა იურისტთა ასოციაციამ და ლონდონში განთავსებულმა მისმა პარტნიორმა ორგანიზაციამ - ევროპის ადამიანის უფლებათა დაცვის ცენტრმა (EHRAC) - მოამზადეს, საქართველოს მოქალაქეები რუსეთს 2008 წლის აგვისტოს ომის დროს მათ წინააღმდეგ ადამიანის უფლებათა შესახებ ევროპული კონვენციის დარღვევებში ადანაშაულებენ.
სარჩელები, ძირითადად, დაბომბვისა და სოფლებზე საჰაერო თავდასხმების ფაქტებს, ქონების განადგურებას, თავისუფლების აღკვეთის შემთხვევებს, სამოქალაქო პირების სიცოცხლის ხელყოფას, მათი სახლების განზრახ დაწვასა და ძარცვას ეხება. ისინი სასამართლოში 34 ჯგუფადაა წარმოდგენილი.
სარჩელებში აღწერილი დანაშაულებები, ძირითადად, მოიცავს ე. წ. სამხრეთ ოსეთის ყოფილი ავტონომიური ოლქის შიგნით და მის მიმდებარე ტერიტორიებზე არსებულ რამოდენიმე სოფელს (აჩაბეთი, არგვიცი, აწრისხევი, ავნევი, ბერულა, ბროწლეთი, ძარწემი, დვანი, ერედვი, კეხვი, კერე, ქიწნისი, ქსუისი, ქურთა, საცხენეთი, ტყვიავი, ვანათი, ზარდიაანთკარი და ზემო ხვითი), ასევე ქალაქ გორს.
