თავდაცვისა და უშიშროების კომიტეტის თავმჯდომარე გივი თარგამაძე კონსტანტინე ყიფიანთან ნაცნობობასა და მასთან საუბარს არ უარყოფს, თუმცა საუბრის ფარულ ჩანაწერებს და ამ საკითხთან დაკავშირებით ატეხილ აჟიოტაჟს "სრულ სისულელეს" უწოდებს. აღნიშნული განცხადება თარგამაძემ დღეს პარლამენტში ჟურნალისტებთან საუბრისას გააკეთა.
"ჩემს სატელეფონო საუბრებთან დაკავშირებით საუბრები ისეთი სისულელეა, რომ მას ყურადღებას არ ვაქცევ. ამ საუბრებში არაფერი მნიშვნელოვანი არ ყოფილა. თუკი ვინმეს ჩემი ყოველდღიური საუბრები ასე აინტერესებს, შეუძლია მომავალშიც მოუსმინოს", - აცხადებს თარგამაძე.
იგი სისულელედ აფასებს ოპოზიციის იმ ბრალდებებსაც, რომელიც მის ე. წ. ქურდულ სამყაროსთან კავშირებს შეეხება.
"ჩემს პოლიტიკურ მოღვაწეობას კარგად იცნობთ. მშვენივრად იცით, როგორი მოწადინებული ვიყავი საქართველოში ქურდული სამყაროს "ასაყვავებლად". შამწუხაროდ, ეს არ გამომივიდა. ვერ მოვარეხრე ქურდული სამყაროს აყვავება პირდაპირი გაგებით და ყველა ქურდი იძულებული გახდა, საცხოვრებლად მოსკოვში წასულიყო", - აცხადებს თარგამაძე.
თარგამაძე გამოეხმაურა გავრცელებულ ინფორმაციას მისი თანამდებობიდან შესაძლო წასვლის შესახებ და აღნიშნა, რომ ეს ინფორმაცია სიმართლს არ შეესაბამება და გავრცელებულია მისი "პოლიტიკური მტრების" მიერ. იგი დასძენს, რომ თანამდებობაზე დარჩება სადეპუტატო ვადის ამოწურვამდე.
