ექსპერტი მამუკა არეშიძე "ქართული ოცნების" რეგიონების სტრუქტურების შექმნაში მონაწილეობას აღარ მიიღებს. ამის შესახებ "ჯი-ეიჩ-ენს" თავად მამუკა არეშიძემ განუცხადა. არეშიძე ამბობს, რომ აღნიშნულ თემაზე მომუშავე ადამიანებს შორის გაურკვევლობასაც ჰქონდა ადგილი, თუმცა კონკრეტულად ვის შორის, არ ასახელებს.
"ქართულ ოცნებას" რეგიონებში სტრუქტურების შექმნაში ვეხმარებოდი. ეს საქმიანობა შევწყვიტე, რადგან სტრუქტურების დიდი ნაწილი დალაგებულია და მეორეც სხვა მნიშვნელოვანი საქმეები დამევალა. არის მესამე მიზეზიც. მას მერე რაც გამოჩნდა საინიციატივო ჯგუფი, მათ შორის მოხდა რეგიონებში სტრუქტურების შექმნის საქმიანობის განაწილება. გაურკვევლობაც იყო. როდესაც პოლიტიკური, საზოგადოებრივი ან პარტიული ორგანიზმი იწყებს მუშაობას ყოველთვის არის გარკვეული თემები, რომელიც შეიძლება ვიღაცას არ მოეწონოს ან მოეწონოს. აქ არაფერ შუაშია ბიძინა ივანიშვილი. გაურკვევლობა იყო იმ ადამიანებს შორის ვინც ვმუშაობდით ამ თემეზე. კონკრეტულად ვის შორის იყო ეს გაურკვევლობა - რა საკვირველია არ ჩამოვთვლი", - განაცხადა "ჯი-ეიჩ-ენთან" საუბარში არეშიძემ.
მისი თქმით, იგი "ქართული ოცნების" რეგიონალური პოლიტიკისა და ეროვნული უმცირესობების მიმართულების ხელმძღვანელად აგრძელებს მუშაობას საზოგადოებრივ მოძრაობაში.
