"დემოკრატიული მოძრაობის" ლიდერ ნინო ბურჯანაძის განცხადებით, რუსეთის ხელისუფლებასთან საუბარი ყველა თემაზე, მათ შორის საქართველოს ოკუპირებული რეგიონის შესახებ, შეიძლება. როგორც მან "ჯი-ეიჩ-ენთან" საუბრისას განაცხადა, საქართველოს ხელისუფლებას აუცილებლად უნდა გაეკეთებინა აქცენტი იმაზე, რომ ვლადიმერ პუტინს, რომელიც 3 თვეში პრეზიდენტი გახდება, სურს საქართველოსთან ნორმალური ურთიერთობა, მას სურს რუსულ-ქართული ურთიერთობების მოწესრიგება და მას არ მოსწონს და არანაირად არ უნდა საქართველო იყოს სამიზნე ან პოლიგონი რუსეთის ან რომელიმე სხვა სახელმწიფოს სამხედრო დაპირისპირებისა.
"ეს არის ის უნიკალური შანსი, რომელიც ჩვენ ყველა შემთხვევაში უნდა გამოვიყენოთ. ოღონდ, ამ შანსის გამოყენება შესაძლებელი იქნება მხოლოდ იმ შემთხვევაში თუ საქართველოს ხელისუფლებაში იქნება პროქართული ძალა და რეალურად ქართული ინტერესებიდან გამომდინარე ძალა და არა პროამერიკული, პრორუსული ან პროავსტრალიური ძალა. მე არაერთხელ მითქვამს იმასთან დაკავშირებით, რომ რუსეთის ხელისუფლებასთან საუბარი შეიძლება ყველა თემაზე. მე ამას ვაცხადებ სრული პასუხისმგებლობით და ეს არა მარტო მე ვთქვი, არამედ ჩემი შეხვედრების შემდეგ რამდენჯერმა იგივე საკითხი ხაზგასმით იქნა აღნიშნული რუსეთის საგარეო საქმეთა მინისტრის განცხადებაში და რუსეთის დღევანდელი პრემიერ-მინისტრის განცხადებაში", - განაცხადა ბურჯანაძე
მისი თქმით, რუსეთის ხელისუფლებასთან საუბარი შეიძლება, თუმცა ეს მარტივი არ იქნება.
"რა თქმა უნდა მე არ ვამბობ იმას, რომ ეს საუბარი იქნება მარტივი, ასევე არ ვამბობ, რომ ამ თემების მოგვარება შეიძლება ერთი ხელის მოსმით, მაგრამ საუბარი და გამოსავლის ძებნა შეიძლება იმ შემთხვევაში თუ რუსეთიც და საქართველოც ერთმანეთის კანონიერ ინტერესებს პატივისცემით და გაგებით მოეკიდებიან", - აღნიშნა "დემოკრატიული მოძრაობის" ლიდერმა.
