საქართველოს ეროვნული საფეხბურთო ნაკრების ყოფილი ფეხბურთელის, მიხიეილ ყაველაშვილის განცხადებით, გიორგი დემეტრაძე სამართალდამცველებმა "უაზრო რამეზე დაიჭირეს". ყაველაშვილი გაზეთ "ალიასთან" საუბარში ამბობს, რომ ქვეყანაში არსებული ავტორიტარიზმი, დემეტრაძის მეგობრებს არ აძლევს საშუალებას მის გვერდით დადგნენ.
"ავტორიტარიზმი რომ არ იყოს ქვეყანაში, რამ უნდა შეგიშალოს ხელი, დადგე იმ ადამიანის გვერდით, რომელიც შენი ბავშვობის მეგობარია, 10-25 წელი ერთად თამაშობდით და ასეთ უაზრო რამეზე დაიჭირეს. თუნდაც, დავუშვათ, დამნაშავე იყოს დემეტრაძე, რისიც მე არ მწამს და ვერ დავიჯერებ, მით უმეტეს, პიროვნულად ძალიან კარგად ვიცნობ და სრული აბსურდია მისი დადანაშაულება ქურდული სამყაროს წევრობაში, მაგრამ ფორმალურად ავიღოთ, რომ დამნაშავეა. როცა ვერავინ ბედავს, მას თანადგომა გამოუცხადოს, ეს იმას მიანიშნებს, რომ ისინი ზეწოლის ქვეშ არიან. ეს ხომ აშკარად გამოჩნდა? მართალია, დემეტრაძის განთავისუფლების მოთხოვნით თავიდან ხელმოწერები დაიწყო, მაგრამ სწორედ ამის შემდეგ დაიწყო ზეწოლები ხელისუფლებამ ფეხბურთელებსა და ფეხბურთის ფედერაციაზე. ამის მერე, კალაძის გარდა, ვერავინ ხმა ვერ ამოიღო", - განაცხადა ყაველაშვილმა.
რაც შეეხება საპროცესო გარიგებას, ყაველაშვილის თქმით, დემეტრაძე არ მიიჩნევს თავს დამნაშავედ და შესაბამისად მას არ უნდა აღიაროს დანაშაული.
"არ ცნობს ის კაცი თავს დამნაშავედ და რატომ უნდა აღიაროს? ეს ხომ ადამიანის ღირსების შემლახავია,,, შეიძლებოდა, ეფიქრა იმაზე, რომ ეღიარებინა დანაშაული, გამოსულიყო და მერე ებრძოლა თავისი სიმართლისთვის, მაგრამ დემე ის ბიჭია, რომელსაც ამის გაკეთებაც არ სურს, მას არ უნდა აღიაროს ის დანაშაული, რომელიც არ ჩაუდენია და მე ვალდებული ვარ, როგორც ადამიანმა და მისმა მეგობარმა, პატივი ვცე მის გადაწყვეტილებას და ეს ვაჟკაცური გადაწყვეტილებაა. ზუსტად იმიტომაც, რომ დემეს შეუძლია, აღიარების სანაცვლოდ თავისუფლება მოიპოვოს და ამ ნაბიჯსაც არ დგამს, ის ათჯერ და ასჯერ მეტად დასაფასებელია და გვერდით დგომა სჭირდება...", - აღნიშნა ყაველაშვილმა.
