შეხვდით ახალ წელს ბათუმში - ამ შინაარსის ვიდეორგოლი დღეიდან თურქეთის სამ წამყვან ტელეარხზე გადის. საიმიჯო კლიპები, რომლებიც შოუ-ტივის, შოუ-თურქისა და სკაითურქის არხებზე ტრიალებს ვიზიტორებს 31 დეკემბრის ღამეს ბათუმში დაუვიწყარ საღამოზე ეპატიჟება. ცნობილი მომღერლის ხულიო იგლესიასის კონცერტის ნახვის მსურველებს სადღესასწაულო დღეებში ზღვისპირა ქალაქში შეღავათიან პირობებში დასვენებაც შეეძლებათ.
ID ბარათები კი, რომლებსაც ვიდეორგოლში მნიშვნელოვანი ნაწილი ეთმობა, მოქალაქეთა გამარტივებული წესით საზღვრის გადაკვეთას უზრუნველყოფს. ახალი სერვისის ამოქმედებიდან დღემდე, 17 დღის განმავლობაში ID ბარათებით თურქეთ-საქართველოს საზღვარი მეზობელი ქვეყნის 30 ათასმა მოქალაქემ გადმოკვეთა.
კლიპები ბათუმზე საახლწლოდ თურქეთის პირველ არხსა და ტვ8-ზეც გავა.
მასალის გამოყენების პირობები
