"დაპირისპირება დიზაინერებს შორის არის და ეს ძალიან იგრძნობა. ერთი ერთ ჯგუფს ეკუთვნის, მეორე მეორეს. ეს უნდა მოისპოს. ეს ყველაფერი აბსურდამდე მიდის და საბოლოო ჯამში არც ერთი მოდის კვირეული აღარ იქნება. ორი კვირეული საქართველოსთვის ძალიან ბევრია, დიზაინერი არ არის ამდენი. "თბილისის მოდის კვირეულის" ორგანიზატორებს ხშირ შემთხვევაში თანხები არ აქვთ, "საქართველოს მოდის კვირეულს" კი დიზაინერები არ ჰყავს. ამიტომ ორი ძალა რომ გაერთიანდეს, დიზაინერებისთვისაც კარგი იქნება და ხარისხსაც უფრო აწევენ", - აღნიშნა ჭყონიამ.

მიუხედავად იმისა, რომ ჭყონია სამოდელო ბიზნესიდან წავიდა, ჩვენს ქვეყანაში მოქმედ ორივე მოდის კვირეულს აქტიურად ესწრება. ბოლო დროს გამართულმა ჩვენებებმა საზოგადოების უკმაყოფილება გამოიწვია, როგორც ორგანიზების, ასევე დიზაინერების კოლექციის ჩვენების კუთხით. როგორც ჭყონია აცხადებს, ამას სხვადასხვა პრობლემის ერთობლიობა განაპირობებს.

"ძალიან რთულია, საქართველოში გააკეთო ნორმალური კოლექცია, იმიტომ, რომ არ არის ქსოვილი, არ არიან პროფესიონალები, რომ ის იდეა გადმოიტანონ, რომელიც დიზაინერს აქვს. ხშირ შემთხვევაში, ამის პრობლემა არის, ვიდრე იდეების. ბევრი ნიჭიერი დიზაინერია, მაგრამ ვინაიდან არ არის ის პირობები, რომ მათ ნორმალურად იმუშაონ, ამიტომ არ არის ის, რასაც ყოველთვის ველოდებით", - განაცხადა ჭყონიამ.